पहलगाम हल्ल्याच्या फांटभूंयेर पुलीस अलर्ट मोडारः गोंयांत सत्यापन मोहीम सुरु

भांगरभूंय | प्रतिनिधी

पणजी ः पेहलगाम हल्ल्या उपरांत म्हत्वाच्या भौशिक सुवातींनी पुलीस बंदोबस्त वाडयलां. पोरण्यां गोंय पुलिसांनी चिंबल, मेरशे आनी सांताक्रूझ वाठारांत व्हड प्रमाणांत सत्यापन मोहीम सुरु केल्या. ह्या कारवायेंत 252 जाणांक ताब्यांत घेतलां, तातुंतल्या 21 जाणांक प्रतिबंधात्मक ताब्यांत दवरल्यात आनी 12 जाणांचेर हेर कायदेशीर कारवाय केल्या.
पर्वरी पुलीस स्टेशनाच्या हद्दींतल्या मॉल दी गोवा काल ​​रातीं पुलीस निरिक्षकांनी मॉलाच्या सुरक्षा रक्षकांक सगल्या सुरक्षा गजालीं विशीं सविस्तर सुचोवण्यो दिल्यो. राज्यांतल्या वेगवेगळ्या वाठारांनी अशे तरेचे उपक्रम चलताले. भौशीक सुरक्षेक कसलोच धोको निर्माण जावचो न्हय हे खातीर ही कारवाय केल्या अशें पुलिसांनी सांगलें.

केंद्रीय गृहमंत्री अमित शाह हांणी शुक्रारा मुख्यमंत्री डॉ. प्रमोद सावंत हांचे कडेन फोन करुन चर्चा केली. ते उपरांत मुख्यमंत्र्यान राज्यांतल्या सुरक्षा परिस्थितीचो नियाळ घेवपा खातीर उंचेल्या पांवड्यावेली बसका घेतली. हे बसकेंत मुखेल सचीव, पुलीस महासंचालक, पुलीस अधिकारी, सीआयएसएफ, नौदल, कोस्ट गार्ड, जिल्लोधिकारी आनी हेर अधिकारी हाजीर आशिल्ले.
ह्या वेळार सुरक्षे खातीर राज्यांत कोम्बिंग ऑपरेशन, अचकीत नाकाबंदी अशें निर्णय घेतले. आतां विमानतळ, रेल्वे स्टेशनां, पर्यटन थळां, बस स्टँण्डाचेर खर सुरक्षा वेवस्था आसतली. सप्तकी बाजारांतल्या विक्रेत्यांची तपासणी जातली. तांणी आपलें वळखपत्र आपल्या कडेन दवरप गरजेचें आसा. राज्यांत 856 ट्रॉलर आनी 1,206 बोटी आसात. तशेंच ट्रॉलर आनी बोटींतल्या कामगारांक बायोमेट्रीक कार्ड दिवन तांचेर नियंत्रण दवरपाचो प्रस्ताव आसा.
मजगतीं, राज्यांत रावपी पाकिस्तानी नागरिकां विशीं हे बसकेंत चर्चा जाली. ह्या वेळार डिप्लोमॅटिक, सरकारी आनी एलटीव्ही सोडून हेर व्हिसा घेवन गोंयांत रावपी पाकिस्तानी नागरिकांक देश सोडपाचो आदेश जारी केला. ह्या सगळ्यांचेर पुलीस, सरकाराची बारीक नदर आसतली. सुरक्षा उपायांक सहकार्य करुन गोंयकारांनी धर्मीक एकचार तिगोवन दवरचें असो उलो मुख्यमंत्र्यान मारलो.

दक्षीण गोंयांत बिराडाक रावप्यां आड सत्यापन मोहीम

दक्षीण गोंयांत पुलिसांनी बिराडाक आनी बेकायदेशीर रितीन रावपी लोकांची खात्री करपा खातीर मोहीम सुरु केल्या. मडगांवा मालभाट वाठारांतल्या खोपींची पुलिसांनी पळोवणी केली तेन्ना बेकायदेशीर रितीन खोपी उबारुन लोक रावतात अशें दिसून आयलें. भलायकी खातें आनी वीज खात्याच्या अधिकाऱ्यांनीय थळाची पळोवणी केली. मडगांव पुलिसांनी ही बेकायदेशीर खोपी मोडून उडोवपाची मागणी केल्या.
मडगांवच्या मालभाट वाठारांत मडगांव पुलिसांनी बिराडाक रावप्यां आड सत्यापन मोहीम केली. पुलीस निरिक्षक सूरज सामंत हांच्या मार्गदर्शना खाला ही मोहीम चलयली. दक्षीण गोंय जिल्लो पुलीस अधीक्षकान दिल्ले म्हायती प्रमाण, पुलीस खात्या कडल्यान मेळिल्ल्या सुचोवण्यां प्रमाण दक्षीण गोंयांतल्या वेगवेगळ्या पुलीस स्टेशनांच्या वाठारांनी भाडेकारांची सत्यापन मोहीम सुरू केल्या. ते प्रमाण बेकायदेशीर रितीन कोण रावता तांचेर कारवाय करतले.

पुलीस निरिक्षक सामंत हांणी सांगलें, आमी गेले तेन्ना बिराडाक रावपी कांय लोक कामाक गेल्ले अशें कळ्ळें. झोपडपट्टी बेकायदेशीर आशिल्ल्याचे दिसून आयलें. जमनीच्या धनयांनी ती तात्पुरती बांदून वीज आनी उदकाची जोडणी दिल्या. भलायकी खात्याचे अधिकारी, वीज खात्याचे अधिकाऱ्यां सयत पालिका निरिक्षकांकूय आपयल्यात.
सगल्या परिस्थितीचो विचार करून वीज खात्याच्या कर्मचाऱ्यांनी वीज जोडणी काडल्या. उदका जोडणीची तपासणी सुरू आसा आनी तीय काडून उडयतले. तशेंच बिराडाक रावप्यांक जागो रितो करपाक सांगपाची सुचोवणी धनयांक दिल्या. हाचे भायर उच्च न्यायालयान नगरपालिका आनी पंचायतींक बेकायदेशीर बांदकामां मोडून उडोवपाचे निर्देश दिल्यात. ते प्रमाण पालिका अहवाल सादर करतले. हे वसणुकेचे लोक चड करून रातच्या वेळार रस्त्यावेल्या लोकांक त्रास दितात. चोरी आनी हेर गैरप्रकार वाडल्यात. हाची जापसालदारकी कोणूच घेना. ते खातीर हांगा कोण रावता तें लेगीत कळना. पालिके कडल्यान ही बांदकामां मोडून उडोवपाची मागणी पुलीस निरिक्षक सामंत हांणी केल्या.