भांगरभूंय | प्रतिनिधी
येवपी दोन वर्सांनी गोंयांत १० ते १२ हजार नोकर्यो
पणजी : पहलगाम आतंकवादी हल्ल्याचो प्रधानमंत्री नरेंद्र मोदी निश्चीतपणान बदलो घेतले, असो विस्वास मुख्यमंत्री डॉ. प्रमोद सावंत हांणी उक्तायलो. भौशीक बांदकाम, गोंय लोकसेवा आयोग तशेंच विवीध खात्यांनी येवपी दोन वर्सांत १० ते १२ हजार नोकर्यो तयार जातल्यो. हांतल्यो ४ हजार नोकर्यो ह्या मनीस संसाधन महामंडळा वतीन भरतले. केंद्र तशेंच राज्य सरकाराक तरणाट्यांच्या फुडाराची सदांच हुस्को आसता. रोजगार उपलब्ध जावपा खातीर विवीध अभ्यासक्रम तशेंच उपक्रम सरकारान सुरू केल्यात, ताळगांवां भाजप मेळाव्यांत उलयतना मुख्यमंत्री डॉ. प्रमोद सावंत हांणी हें वक्तव्य केलें.
भारतीय जनता पक्षाचो ताळगांवां मेळावो जालो. ह्या वेळार प्रदेश अध्यक्ष दामू नायक, आमदार जेनिफर मोन्सेरात, सिद्धार्थ कुंकळयेंकार आनी हेर मानेस्त हजर आशिल्ले.
जे उच्चशिक्षाविभुशीत आसात, तांकां नोकर्यो मेळटल्योच. मात धावी, बारावेक नापास जावपी तरणाट्यांचोय सरकाराक हुस्को आसा. हाका लागून कुशळटायेचेर आदारीत अभ्यासक्रम सुरू केल्यात. अप्रेंटिशीप येवजणेचो १४ हजार तरणाट्यांक लाव जाला. हे येवजणेक तरणाट्यांक़ कामाचो अणभव मेळ्ळो. तशेंच कामाची म्हायतीय मेळ्ळी, अशें मुख्यमंत्र्यान म्हणलें.
त्या राज्यकर्त्यांक लागून आतंकवाद
भारतीय जनता पक्ष हो फक्त देशा खातीरुच काम करपी पक्ष. देशहीत पयलें, हें पक्षाचें तत्व. पहलगामच्या आतंकवादी हल्ल्याक लागून देश परत चिंतेस्त जालो. आतंकवाद आनी आतंकवाद्यांक योग्य तरेन जाप दिवपाक प्रधानमंत्री नरेंद्र मोदी समर्थ आसात. १९४७ ते १९९० मेरेन तेन्नाच्या राज्यकर्त्यांक लागून आतंकवाद वाडलो. ‘काश्मिर फायल्स’ हो चित्रपट पळयल्यार आतंकवाद्याचें भिरांकूळ चित्र मुखार येता. आतंवादा आड केंद्र सरकारान लढाय खर केल्ल्यान पाकिस्तानी लोकांक ४८ वरांनी देश सोडपाचे आदेश दिल्यात.
अध्यक्ष म्हणून दामू नायकांचे १०० दीस पुराय
प्रदेश भाजप अध्यक्षपदाची सुत्रां हातांत घेतल्यार दामू नायक हांणी आयज १०० दीस पुराय केले. ह्या निमतान तांच्या कामाचेर आदारून ‘आमचो दामू नायक १००’ हो विडीयो प्रदर्शीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
