भांगरभूंय | प्रतिनिधी
म्हज्या ऑफिसांतल्या मायेच्या मनशांनी आगरो करून तीन म्हयन्यां उपरांत ड्युटेर वच म्हणलें तेन्ना “आरे, तें कामाक वचपाक लागलें मरे” ही सुशिक्षीत (?) लोकांची प्रतिक्रिया अस्वस्थ करपी आशिल्ली.
कांय गजाली आनी विशय केन्नाच विसरनासपा सारके कायम मनांत आनी काळजांत उरतात.
पहलगाम आतंकवादी हल्ल्यांतलीं काळजाक हात घालपी अनेक दृश्यां आनी खबर नौदल अधिकारी विनय नरवाल आनी तांची घरकान्न हिमांशीचो फोटो जाल्यार काळीज चिरून वचपी. तिचो चेरो निर्विकार, आपल्या घरकारा कुशीक बसून आशिल्ली ती निश्शब्द; शेणिल्ली. पयलेच फावटीं तो फोटो पळयलो आनी तांच्या जाग्यार म्हाका हांव आनी म्हजो दत्तराज दिसलो. फरक फक्त सुवातेचो आनी कारणाचो. पूण दुख्ख तेंच. आपलो मनीस आतां आपल्या सांगाता ना हेच गजालीचें. म्हाका हिमांशीची खूब काळजी जाली, खूब वायट दिसलें. चार दिसांचो तांचो संवसार जाल्यार म्हजो चवदा (14) वर्सांचो. हांव भूतकाळांत गेलें.
कोरोनांत आमी सगलींच हाॅस्पिटलांत एडमीट आशिल्लीं. बरीं जावन घरा येवपाच्या समयार बाबा गेलो हें नर्सी कडल्यान कळटकच दत्तराजान जीव सोडलो. फुडें कितें जालें तें उतरांनी सांगप आनी बरोवप कठीण. म्हजे असलोच जायत्या भयणींचेर आयिल्लो हो प्रसंग. दुख्खदिणो. असो वेळ कोणाचेरूच येवचो न्हय, अशें हांव सदांच देवा लागीं मागतां.
हाॅस्पिटलांत बाराबर गेल्लीं आमी आनी घरा परत हांव एकलेंच आयलें. फुडें म्हजे सामकार कसलें ताट वाडून दवरिल्लें हाची मात लेगीत कल्पना नाशिल्ली. सगल्यांत पयलो धपको आशिल्लो म्हजे वांगडा फाटलीं पंचवीस वर्सां आशिल्ले मम्मीचें. म्हजें काम सोडून वचप. हांव रडलें ना, बोबो, हुयेली मारल्यो नात, हे गजालीचो तिणें हुसको घेतिल्लो. हांव वेवस्थीत आसां, रडूंक बिडूंक ना, अशें तिणें वाड्यार सगल्यांकूच सांगिल्लें आनी भुरगेपणा सावन आज मेरेन ज्या लोकां मदीं हांव वावुरलें त्या सगल्याच आपल्या मानिल्ल्या मनशांच्या धिराच्या उतरांक हांव पारखें जालें. अपवाद कांय लोकांचो आनी नात्यांचो.
म्हज्या ऑफिसांतल्या मायेच्या मनशांनी आगरो करून तीन म्हयन्यां उपरांत ड्युटेर वच म्हणलें तेन्ना “आरे, तें कामाक वचपाक लागलें मरे” ही सुशिक्षीत (?) लोकांची प्रतिक्रिया अस्वस्थ करपी आशिल्ली. घर आनी ऑफीस असोच म्हजो प्रवास आसतालो. मागीर भुरग्यांच्या कार्यावळींक वतालें तेन्ना पालकांचो ‘कितें जालें तेका?’ हो प्रस्न दोळ्यां सामकार काळोख हाडटालो.
फुडें मन घट्ट करून धिरान कार्यक्रमांच्या निवेदनांक वचपाक लागलें, तेन्ना थंयच्या सुशिक्षीत, फुडारिल्ल्या जायत्या जाणांच्यो केन्ना नदरो जाल्यार केन्ना उतरां मन अस्वस्थ करताल्यो. म्हजे सरभोंवतणच्या मनशांचें हें वागप एक व्हड प्रस्नचिन्न उबें करता.
कोणाकूय कितें जालें जाल्यार पाचारप हें आमचें कर्तव्य. गेल्ल्या मनशांचो तो मान आसता आनी ताचे सोयरे वाटेर बी मेळत जाल्यार बरें दिसना. देखुनूच जाप दिवप खूब गरजेचें आसता ही आमकां मेळिल्ली शिकवण आनी संस्कार. आमचो धर्मूय खूब सुंदर. बारा दीस आसतात सुतकाचे, गेल्ल्या मनशाच्या घरा वचपाचे. म्हजे बाबतींत मात आतां पसून चार वर्सां उपरांतूय त्योच गजाली.
दिवाळेची परब मनयतना माननीय प्रधानमंत्री नरेंद्र मोदी हांणी देशाच्या नांवान पत्र बरयलें. ऑपरेशन सिंदूर चालीक लायतना भारतान एकाच धर्माचें पालन केलें अशें न्हय जाल्यार अन्यायाचो बदलोय घेतलो. ऑपरेशन सिंदूर आनी नक्षलवादा आडच्या अभियानांत मेळिल्ल्या यशा खातीर मोदींनी सुरक्षा दळांची तुस्त केली.
पत्रांतलीं हीं उतरां वाचून पहलगाम हल्ल्याची याद जाली आनी मनांतल्यो यादी कागदार आयल्यो.
– चारुशीला दत्तराज देसाय
94211 50739
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
