भांगरभूंय | प्रतिनिधी
कोकणांतल्या दर्यादेगांचेर अलर्ट जारी
मुंबय, खबरां संस्था: पहलगाम दहशतवादी हल्ल्या उपरांत आतां देशभरांतलीं सुरक्षा यंत्रणां अलर्ट जाल्यांत. हेच फाटभूंयेर कोकणांतल्या दर्यादेगांचेर अलर्ट जारी केला. पुलिसांनी गस्त वाडयल्या. तशेंच दुबावी हालचालींचेर लक्ष दवरपाचे आदेश दिल्यात.
मेळिल्ले म्हायती प्रमाण, पुलिसांनी कोकण दर्यादेगेर खबरदारी म्हणून चेकपोस्ट तयार केल्यात. कोकणांत येवपी दरेका वाहनांची चवकशी करची अशे आदेश दिल्यात. सिंधुदुर्ग, रत्नागिरी आनी रायगड ह्या तिनूय जिल्ह्यांतलीं पुलीस यंत्रणां अलर्ट मोडार आशिल्ल्यान २४ वरां गस्त सुरू केल्या.
मरप्यांमदीं महाराष्ट्रांतले पांच जाण
जम्मू आनी काश्मीरच्या पहलगामांत जाल्ल्या आतंकवादी हल्ल्यांत महाराष्ट्रांतल्या पांच जाणांक मरण आयलें. तांतल्या दोगांची वळख पटली. संतोष जगदाळे हांचे तकलेर, कानार आनी फाटीर गुळयो घाल्यो. जाल्यार कौस्तुभ गणबोटे हांचे फाटीर गुळयो घाल्यो.
जगदाळे आपल्या कुटुंबा सयत पहलगाम भोंवपा खातीर गेल्ले. तांचे वांगडा तांची धूव आनी बायलूय आशिल्ली. तशेंच तांची एक सोयरीय आशिल्ली. आतंकवाद्यानी तिगांय बायलांक सोडलें.
जगदाळे हांचे धुवेन सांगलें, आतंकवाद्यांनी तिच्या बापायक कलमा म्हणपाक सांगिल्लें. जेन्ना तें तांकां म्हणपाक जावना तेन्ना तांणी आपल्या बापायचेर गुळयो घाल्यो. हातांत बंदुको घेवन, आतंकवादी थंय लिपिल्ल्या लोकांक सोदताले आनी तांकां मारताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
