भांगरभूंय | प्रतिनिधी
गोंयांतल्या बिराडकारांची पडताळणी; बेकायदेशीर तरेन रावप्यांची घेतात म्हायती
भांगरभूंय । प्रतिनिधी
पणजी : पहलगाम हल्ल्या उपरांत म्हत्वाच्या भौशीक सुवातींनी पुलीस बंदोबस्त वाडयलां. पोरण्यां गोंय पुलिसांनी चिंबल, मेरशें आनी सांताक्रूझ वाठारांत व्हड प्रमाणांत पडताळणी मोहीम सुरू केल्या. हे कारवायेंत 252 जाणांक ताब्यांत घेतल्यात. तातूंतल्या 21 जाणांक प्रतिबंधात्मक ताब्यांत दवरल्यात आनी 12 जाणांचेर हेर कायदेशीर कारवाय केल्या.
पर्वरी पुलीस स्टेशनाचे हद्दींतल्या मॉल दी गोवा मॉलाच्या सुरक्षा रक्षकांक शुक्रारा रातीं पुलीस निरिक्षकांनी सगल्या सुरक्षा गजालीं विशीं सविस्तर सुचोवण्यो दिल्यो. गोंयांतल्या वेगवेगळ्या वाठारांनी अशे तरेचे उपक्रम चलताले. भौशीक सुरक्षेक कसलोच धोको निर्माण जावचो न्हय हे खातीर ही कारवाय केल्या, अशें पुलिसांनी सांगलें.
केंद्रीय गृहमंत्री अमीत शाह हांणी शुक्रारा मुख्यमंत्री डॉ. प्रमोद सावंत हांचे कडेन फोन करून चर्चा केली. ते उपरांत मुख्यमंत्र्यान गोंयांतले सुरक्षा परिस्थितीचो नियाळ घेवपा खातीर उंचेल्या पांवड्या वयली बसका घेतली. हे बसकेंत मुखेल सचीव, पुलीस म्हासंचालक, पुलीस अधिकारी, सीआयएसएफ, नौदळ, कोस्ट गार्ड, जिल्होधिकारी आनी हेर अधिकारी हाजीर आशिल्ले.
बसकेंत सुरक्षे खातीर गोंयांत कोम्बींग ऑपरेशन, अचकीत नाकाबंदी अशें निर्णय घेतले. आतां विमानतळां, रेल्वे स्टेशनां, पर्यटन थळां, बस स्टँण्डाचेर खर सुरक्षा वेवस्था आसतली. सप्तकी बाजारांतल्या विक्रेत्यांची तपासणी जातली. तांणी आपलें वळखपत्र आपले कडेन दवरप गरजेचें आसा. गोंयांत 856 ट्रॉलर आनी 1,206 बोटी आसात. तशेंच ट्रॉलर आनी बोटींतल्या कामगारांक बायोमेट्रीक कार्ड दिवन तांचेर नियंत्रण दवरपाचो प्रस्ताव आसा.
मजगतीं, गोंयांत रावपी पाकिस्तानी नागरिकां विशीं हे बसकेंत चर्चा जाली. ह्या वेळार डिप्लोमॅटीक, सरकारी आनी एलटीव्ही सोडून हेर व्हिसा घेवन गोंयांत रावपी पाकिस्तानी नागरिकांक देश सोडपाचो आदेश जारी केला. ह्या सगळ्यांचेर पुलीस, सरकाराची बारीक नदर आसतली. सुरक्षा उपायांक सहकार्य करून गोंयकारांनी धर्मीक एकचार तिगोवन दवरचों, असो उलो मुख्यमंत्र्यान मारलो.
दक्षीण गोंयांतल्या बिराडकारांची पडताळणी
दक्षीण गोंयांत पुलिसांनी बिराडाक आनी बेकायदेशीर रितीन रावपी लोकांची खात्री करपा खातीर मोहीम हातांत घेतल्या. मडगांवां मालभाट वाठारांतल्या खोंपींची पुलिसांनी पळोवणी केली तेन्ना बेकायदेशीर रितीन खोंपी बंदून लोक रावतात अशें दिसून आयलें. भलायकी खातें आनी वीज खात्याच्या अधिकाऱ्यांनीय थळाची पळोवणी केली. मडगांव पुलिसांनी ह्यो बेकायदेशीर खोंपीं मोडून उडोवपाची मागणी केल्या.
मडगांवच्या मालभाट वाठारांत मडगांव पुलिसांनी बिराडाक रावप्यां आड पडताळणी मोहीम हातांत घेतिल्ली. पुलीस निरिक्षक सुरज सामंत हांच्या मार्गदर्शना खाला ही मोहीम चलयली. दक्षीण गोंय जिल्हो पुलीस अधिक्षकान दिल्ले म्हायती प्रमाण, पुलीस खात्या कडल्यान मेळिल्ल्या सुचोवण्यां प्रमाण दक्षीण गोंयांतल्या वेगवेगळ्या पुलीस स्टेशनांच्या वाठारांनी बिराडकारांची पडताळणी मोहीम सुरू केल्या. ते प्रमाण बेकायदेशीर रितीन कोण रावता तांचेर कारवाय करतले.
पुलीस निरिक्षक सामंत हांणी सांगलें, आमी गेले तेन्ना बिराडाक रावपी कांय लोक कामाक गेल्ले अशें कळ्ळें. झोपडपट्टी बेकायदेशीर आशिल्ल्याचें दिसून आयलें. जमनीच्या धनयांनी ती तात्पुरती बांदून वीज आनी उदकाची जोडणी दिल्या. भलायकी खात्याचे अधिकारी, वीज खात्याच्या अधिकाऱ्यां सयत पालिका निरिक्षकांकूय आपयल्यात. सगल्या परिस्थितीचो विचार करून वीज खात्याच्या कर्मचाऱ्यांनी वीज जोडणी काडल्या. उदका जोडणीची तपासणी सुरू आसा आनी तीय काडून उडयतले. तशेंच बिराडाक रावप्यांक जागो रितो करपाक सांगपाची सुचोवणी धनयांक दिल्या. हाचे भायर उच्च न्यायालयान नगरपालिका आनी पंचायतींक बेकायदेशीर बांदकामां मोडून उडोवपाचे निर्देश दिल्यात. ते प्रमाण पालिका अहवाल सादर करतले. हे वसणुकेचे लोक चड करून रातच्या वेळार रस्त्या वयल्या लोकांक त्रास दितात. चोरी आनी हेर गैरप्रकार वाडल्यात. हाची जापसालदारकी कोणूच घेना. ते खातीर हांगा कोण रावता तें लेगीत कळना. पालिके कडल्यान हीं बांदकामां मोडून उडोवपाची मागणी पुलीस निरिक्षक सामंत हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
