पवित्र म्हयनो : रमजान

भांगरभूंय | प्रतिनिधी

 कुराणान त्या समुदायाचो परिणाम पसून कितें तो मुखार हाडलो. ज्या लोकांनी संदेश मान्य केलो ते प्रकोपा पसून वाचले आनी जांणी संदेश धिक्कारलो तांकां प्रकोपाचो त्रास जालो.

अल्लाह/ ईश्वरान मनशाक रचून ताका अंधकारांत वावुरपाक सोडलें ना तर दरेक काळांत पैगंबर धाडले (सुराः युनूस : 47) जे मनशां मदलेच वेंचिल्ले आसले. जे अल्लाह, ईश्वराचें पालन कशें करचें हाची शिकवण दिताले. संवसाराची  माया, मोह, सैतानाची भुरळ मनशाक सत्य मार्गा पसून पयस करपाक शकता. म्हणूनच अल्लाह/ ईश्वरान सत्य मार्ग दाखोवपाक पैगंबरांक धाडले, जांची गाथा कुराणांत मेळटा. कुराण एक काणी सांगता की एके दर्या देगेर एक वस्ती आशिल्ली, जिका अल्लाह/ ईश्वरान आदेश दिल्लो की शेनवारा नुस्तें धरिनासतना तो दीस ईश्वरी उपासने खातीर दिवचो, पूण कांय लोकांनी आज्ञेचें उल्लंघन केलें, कांय लोकांनी तांकां अशें करपाचें न्हय अशी शिटकावणी दिली तर कांय लोकांनी आडनदर केली. अल्लाह/ ईश्वरान त्या सगळ्या लोकांक ख्यास्त दिली, जांणी ईश्वराचे आज्ञेचें उल्लंघन केले आनी तांकां पसून जांणी उल्लंघन करपी लोकां कडेन आडनदर केली. फक्त त्या लोकांची सुटका जाली जांणी ईश्वरी आदेश पाळपाची धडपड केली. अनेक पैगंबर नोह, इब्राहिम, लूत, सालेह, युसूफ, मुसा, दाऊद , सुलेमान, इसा हांचो इतिहास सांगून कुराण शिक्षण दिता की पैगंबरांनी आपल्या समुदायांक सत्य मार्ग दाखोवपाक खूब यत्न केले, कश्ट घेतले. तातूंतले काय जण सरळ मार्गाचेर आयले आनी कांय  पथभ्रश्ट जाले. कांय जाणांनी पैगंबराचेर अत्याचार करून तांची हत्या पसून करपाचो यत्न केलो आनी कांय जाणांची हत्याय केली. कुराणान त्या समुदायाचो परिणाम पसून कितें तो मुखार हाडलो. ज्या लोकांनी संदेश मान्य केलो ते प्रकोपा पसून वाचले आनी जांणी संदेश धिक्कारलो तांकां प्रकोपाचो त्रास जालो. 

कुराण आवाहन करता, कितलीशीं व्हडलीं व्हडलीं राज्यां आयलीं जांचे कडेन खूब धनसंपत्ती, सेना आशिल्ली. पुण तीं एका धपक्याक नश्ट जालीं. तांचे मदले कांय तर अजून आयच्या काळा खातीर शिकवण म्हणून अल्लाह/ ईश्वरान सुरक्षित राखून दवरलां. देखीक इजिप्तांतलीं फिरावनची मम्मी, जाणें स्वता अल्लाह, ईश्वर आसपाचो दावो केल्लो. त्या दुश्कर्मी बादशाहान पैगंबर मुसाचो नाश करपाचो यत्न केलो. लोकां बरोबर अल्लाहची एक नीती आसा, जेन्ना राज्य वा समुदाय सत्य मार्गाचेर चलता तेन्ना तो ताका स्थापित दवरता आनी जो पदभ्रश्ट जाता ताका सांबाळपाची संद दिता. जर तांणी तें मानूंक ना जाल्यर तांकां नश्ट करता. जालीम लोक पैगंबरांच्या संदेशाक आडमेळीं हाडटाले, कारण पैगंबर तांचे इत्से आड, बनावटी आनी सुवार्थी नेमां आड आसताले. ह्या लोकांक अहंकारान सत्याक स्वीकारपाक दिलेंना. अखेर अल्लाह/ ईश्वरान पैगंबर मुहंमद (स.अ. व) हांकां जगा खातीर अंतिम पैगंबर म्हणून तोच संदेश परत शुद्ध करून कुराणाच्या रूपान दिवन धाडले (सुराः निसा :163). 

कुराण म्हणटा, पैगंबर मुहंमद (स. अ. स.) ह्यांचे बरोबर पसून मक्कावासीयांनी अशीच नीती वापरली. तांणी मुहंमद (स.अ. स) हांका मारपाचो यत्न केलो. तांकां मक्का सोडून मदिना वच्चें पडलें, तरीय तांचे फौजी चढाय जाली. तांकां झूज करचें पडलें.  कुराणांत झुजा विशींचें, पूण नैतिक नेम अवतरित जाले. कुराण म्हणटा, पैगंबराक स्वीकार करचे म्हणल्यार अल्लाहक स्वीकार करचें आनी पैगंबराक ना मानप हें अल्लाहचो इन्कार केल्ले प्रमाण आसा. तोच अल्लाह/ ईश्वर काळ जाणपी आसा आनी म्हणूनच ताणें सगळ्या काळांक समजून हो अंतिम ग्रंथ कुराण कयामत वा प्रलया मेरेन लोकां खातीर अवतरित केला. ताचे सुरक्षेची जबाबदारीय घेतल्या. आदल्या सगल्या ग्रंथांचो सार कुराणांत आसा. हाच्या आदारान जीवन व्यतीत करप हेंच लक्ष्य नेमपाचो उपदेश कुराण दिता (सुराः युनूस: 108). एकीकडे कुराण हाका मार्गदर्शन, शुभसूचना तशेंच वास्तविक सफलताय म्हणटा, थंय ताचें पृथ्वीचेर कशें अनुसरण करचें, जिणेच्या दरेका आंगांत ताचो वापर कसो करचो, हाचो उत्कृश्ट नमुनो मुहंमद (स. अ. स) हांचें व्यक्तित्व आनी जीण आसा. अल्लाहन मनशाक विचार करून निर्णय घेवपाचें स्वातंत्र्य दिलां. ती तो तांचे पसून झोमून घेना, कारण हो ताचो सभाव न्हय आनी असे जर आशिल्लें तर तो सगल्यांक आज्ञाकारीच करपाचो. पुण ताका लोकांची परिक्षा घेवपाची आशिल्ली. ताचोच परिणाम तो आपल्या अंतिम निर्णयान सर्ग आनी नरकाची भेट दिता. 

नैतिकताय / शरियत/ नेम

1. तुमी एक अल्लाह/ ईश्वराची उपासना करात. ताचो भागीदार थारोवं नाकात.

2. आवय- बापाय कडेन बरे वागात. ते जाण्टे जातकच तांकां सांबाळात. तांचे खातीर अल्लाह/ ईश्वरा कडेन प्रार्थना करा की ‘जशे तांणी म्हाका ल्हानपणार मोगान सांबाळ्ळो, तशी तूं पसून ताचेर कृपादृश्टी दवर. 

3. सोयरे, अनाथ, शेजारी, वांगडी हांचे वांगडा बरो वेव्हार करात. 4. सोरो, जुगाराचो निशेद करात. 5. अश्लील कामां पासून पयस रावात. 

6. गरिबीच्या भंयान भुरग्यांची कत्तल करूं नाकात. 7. निश्पाप व्यक्तीची हत्या हें पाप. 8. अनाथांच्या मालाची राखण करात. 9. वजन न्यायपूर्वक करात. 10. न्याय करात, मागीर तो कोणाच्या विरोधांतूय आसूं. (सोयरे वा इश्ट)

11. कोणाचेर अत्याचार करचो न्हय. 12. सोयऱ्याचो हक्क पूर्ण करात, 13. गरिबांक मजत करात, 14. ओगीच खर्च करूं नाकात. अशें करपी सैतानाचे भावबंद आसतात. 

15. काटूकपणा नाकात, फोल्गांय नाकात.  16. व्यभिचारा पसून पयस रावात.  17. घमेंड करची न्हय, 18. कबलाती पूर्ण करच्यो. 19. ज्ञान ना अश्या वस्तूंच्या फाटल्यान लागचें न्हय. 20. कामेच्छेक वैध शीम हुपपाक दिवची न्हय, 21. दुबावाच्या आदाराचेर कसलोच निर्णय घेवचो न्हय, 22. अनुमती नासतना कोणाच्याच घरांत भितर सरचें न्हय. 23. फट उलोवपी, आरोप करप्यांक दंड. 

24. व्याज हें हराम. ताका लागून समाजीक वेवस्था आनी मानवी मुल्ल्यांचो नाश जाता. 25. जकात आनी दान मालांत वाड करतात. 

(उत्तरार्ध)

नझराना दरवेश, पणजी

89750 74456