भांगरभूंय | प्रतिनिधी
सगल्या खात्यांचे मेळून 74 कर्मचारी कूड दर्शन सुवाळ्याक
पणजी : तरेकवार खात्यांचे मेळून 74 सरकारी कर्मचारी कूड दर्शन सुवाळ्याचे वेवस्थे खातीर आसतले. हातूंत तिसवाडी म्हालांतल्या 23 तलाठ्यांचो आस्पाव आसा. 18 नोव्हेंबर ते 7 जानेवारी मेरेन हे कर्मचारी कूड दर्शन सुवाळ्या खातीर पुराय वेळ सेवा दितले.
21 नोव्हेंबर ते 5 जानेवारी मेरेन कूड दर्शन सुवाळो जातलो. सगली तयारी पुराय जावन निमाणो हात घुंवडावपाचो वावर सुरू आसा. कायदो मंत्री अालेक्स सिक्वेरा हांणी सोमारा बसका घेवन तयारेचो नियाळ घेतलो. आयज मंगळारा मुख्यमंत्री डॉ. प्रमोद सावंत हे तयारीची पळोवणी करतले.
नियोजन आनी सांख्यिकी, शिक्षण, भौशीक बांदकाम, कला आनी संस्कृती, पर्यटन, बायलां आनी भुरगीं उदरगत, येरादारी, वीज, अभियांत्रिकी म्हाविद्यालय ह्या खात्यांच्या कर्मचाऱ्यांची खासा कूड दर्शन सुवाळ्या खातीर वेवस्था केल्या. पार्कींगग, सुरक्षा, शिश्टाचार, नोंदणी अशा तरेकवार कामांची जापसालदारी ह्या कर्मचाऱ्यांचेर आसतली.
सुवाळ्याची तयारी पुराय जायत आयल्या. उक्तावण सुवाळ्याक पोप फ्रान्सीस वा प्रधानमंंत्री नरेंद्र मोदी हांंचे पैकीं कोणाचीच उपस्थिती आसची ना. दिल्लीचे आर्चबिशप आनी गोंंयचे सुपूत अनील कुटो हे हाजीर रावतले. मुख्यमंंत्री डॉ. प्रमोद सावंंत आनी हेर मंंत्री, आमदारांंची हाजेरी आसतली. हेर हाजीर रावपी मानेस्तांंची वळेरी दोन दिसांत निश्चीत जातली, अशें फादर हेन्री फाल्कांव हांंणी सांंगलें.
चर्च वाठारांतल्या रस्ते हॉटमिक्स करपा सयत पँडोल उबारपाची कामांं पुराय जाल्यात. कामाचो नियाळ घेवपा खातीर दर दिसा समितीचे वांंगडी तशेंच पदाधिकाऱ्यांंच्यो बसका सुरू आसात. 21 नोव्हेंबराक सकाळीं 9.30 वराचेर पयली प्रार्थना सभा (मास) सुरू जातली. ह्याच वेळार सुवाळ्याचे उक्तावण जातलें. 22 नोव्हेंबर ते 4 जानेवारी मेरेन सकाळीं 7 ते सांंजे 6 मेरेन सेंट फ्रान्सीस झेवियराची पवित्र कूड (रेलिक्स) भविकांंक पळोवपाची वेवस्था आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
