भांगरभूंय | प्रतिनिधी
राज्यांत पयलेच खेपे भाजपा कडल्यान महिलेक उमेदवारी
पणजी : भारतीय जनता पक्षान दक्षीण गोंयची उमेदवारी उद्देजक श्रीनिवास धेंपे हांची घरकान्न पल्लवी धेंपे हांकां जाहीर केल्या. संसदीय मंडळाचे बसकेंत दक्षीण गोंय उमेदवाराचें नांव निश्चीत जाले उपरांत प्रदेश अध्यक्ष सदानंद शेट तानावडे हांणी उमेदवाराच्या नांवाची घोशणा केली. दक्षीण गोंय मतदारसंघ 60 हजाराच्या फरकान भाजप जिखतलो, असो विस्वास मुख्यमंत्री डॉ. प्रमोद सावंत हांणी उक्तायलाे.
दक्षीण गोंयची उमेदवारी जाहीर जाल्ल्यान भारतीय जनता पक्षाचे राज्याचे दोनूय उमेदवार जाहीर जाल्यात. केंद्रीय मंत्री श्रीपाद नायक हांकां हाचे पयलींच उत्तर गोंयची उमेदवारी पक्षान जाहीर केल्या. भारतीय जनता पक्षान पयलेच खेपे महिलेक उमेदवारी जाहीर केल्या. हाचे पयली उत्तर गोंय तशेंच दक्षीण गोंयांत भारतीय जनता पक्षान दादल्याकूच उमेदवारी दिल्या. पल्लवी धेंपे हांच्या नांवाची चर्चा फाटले काय दीस सुरू आशिल्ली. निमाणें तांच्याच नांवाची उमेदवार म्हूण घोशणा जाली.
भारतीय जनता पक्षान उमेदवार थारावपा खातीर वेंचणूक समिती स्थापन केल्ली. ह्या समितीन दक्षीण गोंया खातीर दिगंबर कामत, रमेश तवडकार, अॅड. नरेंद्र सावयकार, दामू नायक आनी चंद्रकांत कवळेंकार ह्या पांच नांवांची शिफारस केल्ली. दिगंबर कामत आनी सभापती रमेश तवडकार हांणी वेंचणूक लडोवपाक इत्सूक नाशिल्ल्याचें पयलींच जाहीर केलें. हाका लागून ही दोन नांवां भायर पडलीं. हाचे उपरांत चंद्रकांत कवळेंकार, अॅड. नरेंद्र सावयकार आनी दामू नायक हांचें मदीं सर्त सुरू जाली. अॅड. नरेंद्र सावयकार आनी चंद्रकांत कवळेंकार हांच्या नांवाचेर बरीच चर्चा जाली. महिला उमेदवाराचो विचार करचो, अशी सुचोवणी केंद्रीय फुडाऱ्या कडल्यान आयिल्ल्यान पक्षान महिला उमेदवाराचो सोद सुरू केलो. साहित्यीक शेफाली वैद्य, सुवर्णा तेंडुलकार, विद्या गावडे हांच्या नांवांचो विचार पक्षान सुरू केलो. महिला मोर्चाच्यो आदल्यो अध्यक्ष सुलक्षणा सावंत हांच्याय नांवाची चर्चा आशिल्ली. वेंचणुकेची कार्यावळ जाहीर जाता म्हणसर पल्लवी धेंपे हांचे नांव मुखार आयलें. दक्षीण गोंय उमेदवारी विशीं दिसान दीस उमळशीक वाडत आशिल्ली. आयतारा पल्लवी धेंपे हांचें नांव जाहीर जालें.
गोंयांत आता मेरेन संयोगिता राणे (उत्तर गोंय) ह्यो एकसुऱ्यो महिला खासदार जाल्यात. पल्लवी धेंपे हांकां उमेदवारी जाहीर जाल्ल्यान दुसऱ्यो महिला खासदार जावपाची शक्यताय आसा. वेंचून आयल्यो जाल्यार त्यो दक्षीण गोंयच्यो पयल्यो महिला खासदार थारतल्यो.
……………………………………
प्रधानमंत्री नरेंद्र मोदी हांच्या कार्याक लागून समाजातलें सगले घटक सशक्त जावपाक लागल्यात. जात, धर्म हांचें मदी कसलोच भेदभाव करिनासताना सरकार सगळ्यांक समान संद उपलब्ध करून दीत आसा, अशें पल्लवी धेंपे हांणी उमेदवारी जाहीर जाले उपरांत सांगलें.
उमेदवारी दिवपा खातीर प्रधानमंत्री नरेंद्र मोदी, गृह मंत्री अमीत शाह, मुख्यमंत्री डॉ. प्रमोद सावंत, अध्यक्ष सदानंद शेट तानावडे, केंद्रीय मंत्री श्रीपाद नायक आनी भाजपाच्या सगल्या कार्यकर्त्यांचें हांव उपकार मानतां, अशें तांणी सांगलें.
……………………
400 सुवातां मदीं गोंयच्यो दोनूय सुवातो आसतल्यो : सदानंद शेट तानावडे
पल्लवी धेंपे ह्यो भाजपाच्यो वांगडी आसात. तांच्या जैता खातीर सगले फुडारी आनी कार्यकर्ते वावुरतले. भारतीय जनता पक्ष प्रणीत रालोआक हे खेपे 400 सुवातो मेळटल्यो. ह्या 400 सुवातां मदीं गोंयच्या दोनूय सुवातांचो आस्पाव आसतलो, अशें प्रदेश अध्यक्ष सदानंद शेट तानावडे हांणी सांगलें.
भारतीय जनता पक्षान लोकसभा वेंचणुके खातीरचो प्रचार सुरू केला. सगल्या थरांतल्यान पक्षाक तेंको आसा, असो दावो तांणी केलो.
………………………
दक्षीण गोंयच्या जैता विशीं फुडाऱ्यांक विस्वास
केंद्र आनी राज्य सरकाराचो वावर आनी कार्यकर्त्यांच्या बळग्याचेर दक्षीण गोंयांत भाजपाचे जैत निश्चीत आसा, अशें आदले आमदार दामू नायक हांणी सांगलें. चंद्रकांत कवळेंकार, आमदार उल्हास तुयेंकार हे लेगीत पक्षाच्या उमेदवारा खातीर वावुरतले, अशें ह्या वेळार तांणी स्पश्ट केलें.
केमेस्ट्रीच्यो पदवीधर आशिल्ल्यो पल्लवी धेंपे हांणी एमआयटी पुणें सावन एमबीएची पदवी घेतल्या. धेंपे इंडस्ट्रीजच्यो त्यो कार्यकारी संचालक आसात. धेंपे चॅरिटीज ट्रस्टाच्यो त्यो वांगडी आसात. गोंय विद्यापीठ शिक्षण मंडळाच्यो त्यो 2012 ते 2016 हे कालावधीत वांगडी आशिल्ल्यो. गोंय कांक्र सोसायटी, अ. भा. वेवस्थापन संघटणेच्यो त्यो वांगडी आसात.
दक्षीण गोंयांत 60 हजार मताधिक्यान जैत : मुख्यमंत्री
दक्षीण गोंय मतदारसंघात पयलेच खेपे महिलेक उमेदवारी मेळ्ळ्या. नारी शक्तीच्या तेंक्यान दक्षीण गोंय मतदारसंघ भारतीय जनता पक्ष 60 हजारांच्या मताधिक्यान जिखतले असो विस्वास मुख्यमंत्री डॉ. प्रमोद सावंत हांणी उक्तायलाे. दक्षीण गोंयची उमेदवारी निश्चीत जाले उपरांत मुख्यमंत्री डॉ. प्रमोद सावंत हांणी पत्रकार परिशद घेतली. हे वेळार प्रदेश अध्यक्ष सदानंद शेट तानावडे, उमेदवार पल्लवी धेंपे आनी हेर फुडारी हाजीर आशिल्ले. धेंपे उद्देग समुहान उद्देगीक , धार्मीक, शिक्षणिक तशेंच सांस्कृतीक वाठारांत वावर केला. तांच्या कार्याची दखल दक्षीण गोंयचे मतदार निश्चितपणान घेतले. फाटलीं 100 परस चड वर्सां धेपे कुटुंब तरेकवार मार्गान जनतेची सेवा करीत आसा. आतां खासदार जावन पल्लवी धेंपे समाज कार्य सुरूच दवरतली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
