भांगरभूंय | प्रतिनिधी
भायर तसो बोर्ड लावपाचे उच्च न्यायालयाचे निर्देश
चेन्नय, खबरां संस्था ः मद्रास उच्च न्यायालयान हिंदू धर्मीक आनी धर्मदाय संस्थांक हिंदू देवळा भायर ‘फक्त हिंदू लोकांक प्रवेश आसा’ अशें बोर्ड लावपाचे निर्देश दिले. दक्षिणे कडल्या जायत्या देवळांनी कोडिमारम (ध्वजस्तंभ) उबारल्यात. फक्त हिंदू लोकांनी ह्या ध्वजस्तंभाच्या भितर प्रवेश करचो, अशें बरयल्ले बोर्ड लावचे, अशें निर्देश उच्च न्यायालयान दिल्यात. तमिळनाडूच्या डिंडिगुल जिल्ह्यांतल्या पलानी दंडयुथापानी स्वामी देवळान हे संबंदी उच्च न्यायालयांत याचिका दाखल केल्ली.
दर दिसा हजारांनी भक्त ह्या लोकप्रीय पलानी मुरुगन देवळाक भेट दितात. हांतूत अहिंदू लोकांचोय व्हड प्रमाणांत आस्पाव आसता. पूण तांचे वागणुकेंक लागून हिंदू धर्माच्या भक्तांच्यो भावना दुखावतात. देखून तांकां देवळांत प्रवेश करपा पसून आडावचें अशें याचिकादार आनी पलानी देवळाचो मंडळ वांगडी सेंथिल कुमार हांणी आपले याचिकेत म्हणलां.
हो निकाल दितना उच्च न्यायालयाची न्यायाधीश एस. श्रीमती हांणी सांगलें, अहिंदू पर्यटक जर व्हड प्रमाणांत देवळाच्या आवारांत येतात जाल्यार देवूळ प्रशासनान ताची खात्री करची. देवळाक भेट दिवपी अशा लोकां मदीं सगळे भक्त आसात काय? तांची देवाचेर खरेंच श्रद्धा आसा काय? ते हिंदू धर्माच्यो चालीरिती आनी परंपरा पाळटात काय? आनी देवळान सांगिल्लो पोशाख ते न्हेसतात काय? हें पळोवप ही देवूळ प्रशासनाची जापसालदारकी. अहिंदू लोकांक देवळांत प्रवेश करपाचो आसल्यार देवळाच्या नेमांक पाळो दिवन देवळ प्रशासनाच्या नोंदणेंत नांवाची नोंदणी करची पडटली, अशेंय उच्च न्यायालयान सांगलां.
पलानी दंडयुथापानी स्वामी देवळांत हिंदू लोकांनीच देवळांत प्रवेश करचो, असो बोर्ड लायिल्लो. पूण कांय काळा उपरांत थंयच्यान तो काडून उडयलो. देवूळ प्रशासनान उच्च न्यायालयात याचिका दाखल केले उपरांत न्यायालयान परत एक फावट बोर्ड लावपाचे निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
