भांगरभूंय | प्रतिनिधी
म्हापशें ः पीडीए कॉलनी, पर्वरी आनी आल्तो बेलाविस्ता सांगोल्डाच्या ज्येश्ठ नागरिकांची कुरीअर डिलिव्हरीच्या नांवान कोंचून व्हेल्ल्यो ३.७० लाखांच्यो सरपळ्यो पर्वरे आनी साळगांव पुलिसांनी पुणे आनी कोल्हापुरांतल्या शेटयां कडल्यान जप्त केल्यो. ह्या प्रकरणांत दुबावीत राणप्रिया अजय हसमुख उर्फ माच्ची किशोरभाई (४४, रा. नवसारी, गुजरात) हाका पुलिसांनी अटक केल्ली.
पर्वरेचे चोरयेची १ लाख ८० हजारांची भांगराची सरपळी पुणेच्या एका शेटीक विकिल्ली. ती सरपळी पर्वरे पुलिसांनी थंयच्यान जप्त केल्या. जाल्यार सांगोल्डा जाल्ले चोरयेंतली १ लाख ९० हजारांची भांगराची सरपळी दुबावितान कोल्हापुरच्या एका भांगराच्या दुकानांत विकिल्ली. साळगांव पुलिसांनी ही भांगराची सरपळी जप्त केल्या.
मजगतीं, फाटल्या ७ जुनाक दनपरां सुमार ३.३० वरांचेर आल्तो बेलाविस्ता सांगोल्डा हांगच्या डॉ. अरूण वळवयकार (७५) हांच्या गळ्यांतली १.९० लाखांची भांगराची सरपळी दुबावितान कोंचून वह्ेल्ली. जाल्यार ता. २४ जुलयाक सांजेवेळार ५.३० वरांचेर पीडीए कॉलनी पर्वरेची श्रीमती हरीहर (६५) हांच्या गळ्यांतली १ लाख ८० हजारांची भांगराची सरपळी दुबावितान चोरिल्ली.
कुरिअर डिलिव्हरी बॉय जावन दुबावीत आरोपी आयिल्लो आनी दोनूय फिर्यादींक पत्र दिवपाचें सांगून तांच्या गळ्यांतली भांगराची सरपळी कोंचून दुचाकीवेल्यान पळ काडिल्ली.
पीडीए कॉलनींत चोरयेची घडणूक घडटांच पर्वरे पुलिसांनी रोखडेंच चोराक सोदपाचें काम हातांत घेतलें. चोरी घडिल्ल्या वाठारांतले कॅमेर्यांची पडताळणी केली आनी ते प्रमाण ता. २७ जुलयाक दुबावीत राणप्रिया अजय हसमुख उर्फ माच्ची किशोरभाई हाका अटक केल्ली.
दुबावीत आरोपीचो सांगोल्डाचे चोरयेंतूय आसपाव आशिल्ल्याचें समजतांच ताका साळगांव पुलिसांनी अटक केल्ली. दुबावीताक सध्या न्यायालयीन बंदखणींत धाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
