भांगरभूंय | प्रतिनिधी
सकाळच्या आदेसाक म्हामार्गा वयल्या कांय भागांनी येरादारी बंद
भांगरभूंय । प्रतिनिधी
पणजी : उत्तर गोंय जिल्होधिकारी अंकीत यादव (आयएएस) कार्यालया कडल्यान उडवाडायिल्ले सुचोवणे प्रमाण, भौशीक बांदकाम विभाग सोमारा 13 ऑक्टोबराक राष्ट्रीय म्हामार्ग 66 चेर ट्रायल रन घेतलो. सकाळीं 10 ते दनपारां 1 वरा मेरेन कांय म्हामार्गा वयल्या वाठारांतली येरादारी पुरायेन बंद आसतली. ह्या काळांत लोकांनी पर्यायी मार्गाचो वापर करचो, अशें कळयलां.
ह्या ट्रायल रन मजगतीं, ओ कोकेरो ते शिवाजी चौक मेरेनच्या दावे वटेंतल्या मुख्य मार्गा वयली आनी दामियान द गोवा ते आराडी जंक्शन, सुकूर मेरेनच्या उजवे वटेनच्या मार्गा वयली येरादारी सर्वसामान्य गाडयां खातीर बंद आसतली. फकत आपत्कालीन सेवा देखीक, अॅम्ब्युलन्स आनी उजो पालोवपी दळाच्यो गाडयो हांकां परवानगी आसतली.
मजगतीं व्हड गाडयांक पणजे वटेन येवचे कातीर पर्यायी मार्ग दिल्यात. गरजेच्यो वस्तू आनी इंधन टँकर घेवन वचपी गाडयां भायर हेर व्हड गाडयो, तशेंच आलिशान प्रवासी पशी करासवाडो मार्गान- थिवी- अस्नोडें मार्गान दिवचल आनी थंयच्यान सांखळे वचपाचे निर्देश दिल्यात. ल्हान गाडयो आराडी जंक्सन मार्गान डिफेन्स कॉलनी, कदंबा डेपो आनी बी. बी. बोरकार मार्गान सर्वीस रस्त्यान शिवाजी चौकांत प्रवेश करपाक शकतले. सुकूर ते सांगोल्डें जंक्शन मार्गान सुकूर चर्च जंक्शन हो मार्ग एकमार्गी (वन वे) करतले. तशेंच म्हापशे वटेन वचपी येरादारी ओ कोकेरो जंक्शन मार्गान चोगम रोड, सांगोल्डें- गिरी ह्या मार्गान घुंवडायतले. थळाव्या लोकांक आनी वेवसायीक आस्थापनांक तशेंच अॅम्ब्युलन्स आनी उजो पालोवपी दळ ह्या सारकिल्ल्या आपत्कालीन सेवांक ह्या काळांत प्रवेश सुविधा दितले. हे खातीर साबार सुवातांचेर येरादारी पुलीस, दिशा दाखोवपी तकटे, नो पार्कींग तकटे लायतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
