भांगरभूंय | प्रतिनिधी
केंद्रीय मंत्री नितीन गडकरी हांचें आस्वासन; देवस्थान समिती, समाज वावुरप्यांनी घेतली भेट
भांगरभूंय । प्रतिनिधी
पणजीः पर्वरे फ्लायओव्हराक लागून धोक्यात आयल्लो 200 वर्सां पयलीचो वड वाटोवपा खातीर उपाय येवजण हातांत घेवपाचें आस्वासन केंद्रीय मंत्री नितीन गडकरी हांणी दिलां. उड्डाण पूल बांदतना हो वड कसो वाटोवपाक मेळटलो हाचो अहवाल अभियंत्याक तयार कर म्हूण सांगला, अशी म्हायती केंद्रीय मंत्री तशेंच उत्तर गोंयचे खासदार श्रीपाद नायक हांणी दिली.
पर्वरे म्हामार्गार उड्डाण पुला खातीर धोक्यात आयल्लो वड आनी खाप्रेश्वर देवस्थान वाटावपाची मागणी करपा खातीर देवस्थान समितीचे अध्यक्ष कार्तीक कुडणेंकार आनी समितीचे हेर वांगडी तशेंच समाज वावुरपी संजय बर्डे, शंकर पोळजी आनी हेरांच्या शिश्टमंडळान श्रीपाद नायक हांचे सयत केंद्रीय म्हामार्ग आनी येरादारी मंत्री नितीन गडकरी हांची भेट घेतली आनी तांकां एक निवेदन भेटयलें.
200 वर्सां सावन आतांमेरेन अस्तिवांत आशिल्ल्या वडाक फक्त पर्वरीचेच लोक न्हय जाल्यार बाकीचे लोकूय ताका देवा समान मानतात. त्या झाडा वांगडाच खाप्रेश्वर देवस्थान वाटावपा खातीर लोक एकठांय आयल्यात. तांची तांचेर श्रध्दा आसा, अशें श्रीपाद नायक हांणी निवेदन भेटयले उपरांत सांगलें.
म्हामार्गाच्या कामॉंक लागून ह्या वडाक हात लावचो न्हय, अशी दरेकल्याची मागणी आशिल्ली. हे खातीर हे विशींचे निवेदन आमी सगळ्या वाठारांतल्या लोकांनी मंत्री गडकरी हांकां भेटयलें. आमी सांगलें, हें काम पयलीं केल्ल्यार सोंपें जावपाचें, पूण आतां उशीर जालो आसलो तरीय तुमी खंयचेय पद्दतीन हो देवाचो वड आनी खाप्रेश्वराचें देवस्थान सांबाळपाचो यत्न करचो, अशें नायक हांणी सांगलें.
मॅपाचेर वडाचें थळ पळोवन मंत्री गडकरी हांणी हो वड सांबाळपाचें आमका आस्वासन दिलां. तांणी अभियंत्याक आपोवन हो वड कसो वाटावपाक मेळटा हाचो अहवाल तयार करून दिवचो असो आदेश दिला. म्हाका खात्री आसा आमच्या सगळ्यांच्या उतराक वालोर दिवन मंत्री गडकरी आमची मागणी मान्य करतले, अशें नायक हांणी सांगलें. भेटी वेळार गडकरी हांणी सांगलां, फुडल्या दोन- चार दिसांनी हायवेचे जे तज्ञ आसात तांकां ते सुवातेची पळोवणी करून फुडलीं पावलां उखलपाक सांगलां आनी ते मेरेन हे सुवातीचेर कसलेंच काम सुरू करचें न्हय अशे निर्देश दिल्यात, अशें खाप्रेश्वर देवस्थान समितीचे अध्यक्ष आनी जिल्हो पंचायत वांगडी कार्तीक कुडणेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
