भांगरभूंय | प्रतिनिधी
म्हापशें: वडा कडेन सुकूर पर्वरे श्रीदेव खाप्रेश्वर देवूळ कुशीक काडले उपरांत थंय एका पानपट्टीकारान आपलें बस्तान मांडलां. देवूळ कुशीक काडिल्ल्या आनी सर्व्हीस रोडाचे सुवातेर उक्तेपणान पानपट्टीचें स्टॉल उबारलां.
पर्वरे उड्डाण पुलाच्या बांदकामाक आडखळ थारपी श्रीदेव खाप्रेश्वर देवूळ तशेंच थंयचो रूख फाटल्या 3 मार्च दिसा कुशीक काडिल्लो. उपरांत उड्डाण पुलाच्या कंत्राटदारान हांगा सर्व्हीस रोडाचें बांदकाम करपा खातीर फातराचें आवरण घालां.
हेच सुवातेर पानपट्टीचें स्टॉल उबारलां. म्हामार्गा वेल्यान यो-वच करपी वाहन चालक हे विशीं अजाप उक्तायतात. हालींच उच्च न्यायालयान म्हामार्ग रस्त्याचे कुशीची तशेंच शेत जमीन आनी सरकारी मालमत्तेंतल्या बेकायदो बांदकामाचेर कारवाय करपाचे निदेश सरकाराक दिल्यात.
तशेंच तंबाकूचे पदार्थ उक्तेपणान विकपाक सरकाराची बंदी आसा. तरी लेगीत सुकूर पंचायत वाठारांत आनी तें लेगीत सरकारी जमनींत हें पानपट्टीचें स्टाॅल कोणाच्या राजकी आशिवार्दान उबारलां असो प्रस्न हांगासरल्या नागरिकांनी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
