पर्वरे उड्डाण पुलाच्या कामाक लागून येरादारीची कोंयडी

भांगरभूंय | प्रतिनिधी

पणजीः पर्वरे सध्या उड्डाण पुलाचें काम नेटान चालू आसा. पूण रस्ते आनी येरादारीचे सारके वेवस्थापन नाशिल्ल्यान थंय गाडयांची गचमुड्डी पळोवपाक मेळटा. तशेंच रस्तें घुंवडायिल्ल्याचे थंय दिका दाखोवपी तकटे नाशिल्ल्यान वाहनां चालकां मदीं मदीं कोफुसांव जावन रावला. गर्देच्या वेळार लोकांचे सामकेच पासियेस पेड्ड्यार जातात.

पर्वरे उड्डाण पुला खातीर खांबे मारपाचें काम हातांत घेतला. आतां हे काम मॉल दे गोवा मेरेन पावला. पयलीं हायवे मदेगाद काम सुरू आसतना तीन बिल्डींग पर्वरी बगल रस्त्या कडल्यान येरादारी घुंवडायिल्ली. आतां हें काम फुडें पावला आनी मुखेल रस्त्यां मदेगाद खांबे उबारपाक सुरवात जाल्या. रस्त्या कुशीक शिमीट आनी खडी घालून बारीक रस्तो गाडयां खातीर केला. पूण ह्या रस्त्या वयल्यान वाहन चलयतना त्रासाचें जालां.

मॉल दे गोवा आयल्यान खणपाचें काम चल्लां, थंय दोन रस्ते केल्यात. एक हायवे कुशीच्यान आनी दुसरो नोव्हा सिदादे कॉम्प्लेक्सांतल्यान. हायवेच्या रस्त्याचेर यंत्रणा येता तेन्ना नोव्हा सिदादे कॉम्प्लेक्सांतल्यान येरादारी घुंवडायतात. पूण ही येरादारी केन्ना घुंवडायतात हाचो नेम ना. केन्ना केन्ना मदींच यंत्रणा घालून हायवे कडलो रस्तो आडयतात. जाल्यार केन्नाय दोनूय रस्ते वांगडाच उक्तें दवरतात, देखून फुडें जंक्शनाचेर कोफुसांव जाता.

तशेंच नोवा सिदादी कॉम्पलेक्सा कडेन खंयचो बगल रस्तो घेवचो ही सुचोवणी दिवपी कसलोच दिका दाखोवपी तकटो ना. मॉल दे गोवा मुखार दोन रस्ते आसात. सद्या एक बंद आसा, आनी दुसरे वटेंतल्यान येरादारी घुंवडायल्या हे सांगपा खातीर कसलीच सुचोवणी तकटो थंय ना.

ह्या म्हामार्गा वेल्यान सदांच येरादारी करपी म्हापशेंचे थळावे सीतेश मोरे हांणी सांगलें, उड्डाण पुलाचें काम हातांत घेवचे पयलीं सारकें नियोजन जावंक नाशिल्ल्यान हे कोफुसांव जाला.

पुलाचें काम सुरू करचें पयली हायवेच्या बगल रस्त्याचें काम पयली पुराय करपाक जाय आसले. काम चालू आसतनाच ह्या बगल रस्त्यांचें काम हातांत घेतिल्ल्यान वेवस्था येरादारी फ्लॉप थारल्या, असो आरोप मोरे हांणी केलो.

बांदकाम सुवातेर जी येरादाराची गचमुड्डी जाता ते सुवातेर येरादारी पुलीस दवरप गरजेचें. पूण हे पुलीस भितरल्या रस्त्यार तालांव मारपा खातीर खाचीन उबे रावतात. मुखेल रस्त्यार एकूय पुलीस नासता, असोय दावो मोरे हांणी केलो.

उड्डाण पुलाचें काम बरे नेटान चालू आसा हातूंत कांयच दुमत ना. पूण हे काम करचे पयलीं योग्य तरेन नियोजन करून एक लेन बगल रस्तो तयार करून येरादारी खातीर उक्ती दवरिल्लो जाल्यार ही समस्या जावपाची नासली, अशे मोरे म्हणटा.

——————-

उड्डाण पुला खातीर 12 खांबे तयार

पर्वरे उड्डाण पुलाचें 12 खांबे तयार जाल्यात जाल्यार 17 खांबे घालपा खातीर खणपाचें काम चालीक लागला. पर्वरे डेल्फिनोस जंक्शन ते गिरी जंक्शन मजगतीं वट्ट 86 खांबे येवपाचे आसात जाल्यार ह्या खांब्याचेर 1,431 कॉन्क्रीट सॅगमेन्ट्स बसोवन ताचे वयर रस्तो तयार जातलो. 5.14 कोटी खर्चून सुमार 600 कोटी खर्चाचो उड्डाण पूल तयार करपा खातीर दिसाचे 24 वरा झुजां पांवड्यार हे काम चालू आसा.