भांगरभूंय | प्रतिनिधी
पणजी : पीडब्ल्यूडीन पर्वरेच्या स पदरी उड्डाण पुलाच्या बांदकामाक गती दिवपा खातीर एक आगळें वेगळें ’ट्रायल रन’ (तपासणी) घेवपाचें थारायलां. मात आयज, सोमारा 13 ऑक्टोबराक सकाळीं 10 ते दनपरां 1 ह्या वेळार राष्ट्रीय महामार्ग क्रमांक 66 च्या कांय भागांचेर घेतिल्लो हो ’ट्रायल रन’ पुरायेन फसलो. ह्या तीन वरांचे तपासणेक लागून पर्वरे बरोच बोवाळ निर्माण जालो. कामगार वर्ग, विद्यार्थी, अॅम्ब्युलन्स आनी सदांच प्रवास करपी प्रवाश्यांक हांगच्या रस्त्याचेर बरेच त्रास सोंसचे पडले.
स लेन फ्लायओव्हराचें काम पुराय करपा खातीर राष्ट्रीय म्हामार्ग पुरायपणान बंद करचे पयलीं कितें परिस्थिती निर्माण जावपाक शकता हाचो अदमास काडपा खातीर ही तपासणी केल्ली. पर्यायी मार्गांचेरूय वाहनांची लांब रांक दिसली. म्हामार्गाचेर येरादारी नियोजन करिनासतना भितरल्या रस्त्याचेर (सर्व्हीस रोड) ती घुवडायिल्ल्यान येरादारीचो गंभीर प्रस्न निर्माण जालो. आराडी जंक्शन ते सुकूर इगर्जे मेरेन गाडयांची लांब रांक लागिल्ली. आराडी- सुकूर आनी चोगम ह्या दोनूय पर्यायी मार्गांचेरूय येरादारी ठप्प जाल्ली. हे कोंयडेक लागून खूबश्या लोकांची ऑफिसाची वेळ चुकली, जाल्यार भुरगीं उसरां शाळेंत पावलीं. हे अपेशी तपासणेंत हें स्पश्ट जालां, सध्याचे स्थितींत पर्यायी मार्गांचेर व्हड येरादारी कोंयडी जावपाची शक्यताय आसा. हाका लागून आतां पीडब्ल्यूडी आनी प्रशासनान उड्डाण पुलाचें काम पुराय करपा खातीर नवी येरादारी नियंत्रण येवजण अदीक गांभिर्यान आनी प्रभावीपणान आंखपाचेर विचार करचो, अशी मागणी सध्या जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
