भांगरभूंय | प्रतिनिधी
पणजी : पर्वरेकारांचें तशेंच हेर जायत्या भाविकांचें श्रद्धास्थान आशिल्ल्या वडा कडल्या श्रीखाप्रेश्वर देवाची मुर्ती काडली. थंयच्यान वडाचें झाडूय हुमटून कुशीक काडलें. आयज मध्यानरातीं सुमार ३ वरांचेर श्रीखाप्रेश्वर देवाची मुर्ती काडली. ह्या वेळार कसलेच तरेचो बोवाळ जावचो न्हय म्हणून व्हड पुलीस बंदोबस्त दवरिल्लो.
मजगतीं, हालयिल्ली श्रीखाप्रेश्वर देवाची मुर्ती गिरी हांगा कंत्राटदाराच्या कंटेनरांत तात्पुरती दवरल्या. हांगाय पुलिसांचो खर बंदोबस्त आसा. हांगचो वडूय तीन भागांनी कापला. तो आतां दुसरे कडेन व्हेला. थंय तो लायतले.
मजगतीं, देवळाक हात लावचो न्हय अशे उच्च न्यायालयाचे आदेश असून लेगीत तें मोडपाक फुडें सरिल्ल्या कामगारांक कांय काळ भाविकांनी आडायले. काल सांजवेळा मेरेन तणावाची स्थिती निर्माण जाल्ल्यान पुलिसांक आनीक पंगड मागोवचे पडले. तरी प्रशासनान कांय राजस्थानी पुजार्यांचे मजतीन देवकार्य करून मुर्ती हालोवपाचें काम सुरू केलें. ह्या वेळार कामांत आडखळ निर्माण करपी दोगांक पुलिसांक ताब्यांत घेतले.
देवाची मुर्ती कटराचे मजतीन काडपाचें काम सुरू आसतना तीन कटर तुटले. मुर्ती काडपा खातीर कटर नाशिल्ल्यान काम थारोवचें पडलें. जायते यत्न करून लेगीत काल सांजवेळार मेरेन मुर्ती काडूंक मेळूंक ना. लोकांच्या वाडपी विरोधाक लागून प्रशासनान हें काम मागीर करपाचें थारायलें. उपरांत मध्यानरातीं ही मुर्ती काडली. मजगतीं, हें काम चलतना गाडयो भितरल्या मार्गान गेल्ल्यान थंय त्यो अर्द ते पाऊण वर आडकून उरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
