भांगरभूंय | प्रतिनिधी
भांगरभूंय । प्रतिनिधी
पर्वरीः पर्वरे पियेवपाच्या उदकाचो प्रश्न सामको गंभीर जाला. पर्वरेच्या उदका शुद्धिकरकण प्रकल्पाच्या स्टोरेज टॅन्कांत उदक नाशिल्ल्यान फाटल्या आठ दिसां सावन नळांक उदकाचो एक थेंब लेगीत येना. तिळारीतल्यान उदका प्रकल्पाक उदकाची पुरवण जावपाक आनीक आठ दीस लागतले असो अदमास आसा.
सध्या लोकांक अस्नोडेच्या उदका प्रकल्पांतल्यान उदका पुरवण सुरू आसा. रेशनीग पद्दतीन ती सुरू आशिल्ल्यान नळांक केन्ना उदक येतलें हेंच कोणाक खबर आसना. सध्या फकत अर्द वर दर एक दिसा आड उदक मेळटा. उदकाक प्रेशर नाशिल्ल्यान तें सारकें येना. लोक बांदकाम खात्याच्या नांवान बोटां मोडटना दिसतात.
लोकांक सध्या पुरायपणान उदकां टॅन्करांचेर निंबून रावचें पडटा. टॅन्करवाल्यांनी परिस्थितीचो लाब घेवपाक सुरवात केल्या. एका टॅन्कराक लोकांक 1200 तें 1500 रुपये मेजचे पडटात. पयलीं व्हो दर सातशें तें णवशें रुपये आसतालो. कशें करून उदक हाडून दियात अशें टॅन्करवाल्यांक लोकांक सांगचें पडटा. बांदकाम खात्याच्या उदका पुरवण कार्यालया कडेन फकत एक टॅन्कर आसा. ताणी सध्या आनीक कांय टॅन्कर हाडले तरी तांचे कडेन उदक नाशिल्ल्यान लोकांक वरांची वरां टॅन्करांची वाट पळोवची पडटा. फाटल्या पंदरा वर्सां उपरांत पयलेच फावट पर्वरे वाठारांत उदकाचो सामको उणाव जाला. उदक शुद्धिकरण प्रकल्प उबारून कांयच उपेग ना अशें दिसपाक लागलां अशें एका एका थळाव्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
