पर्वरेच्या ‘घरान’ रेस्टॉरेंटाक उजो
भांगरभूंय | प्रतिनिधी
कळंगुटे ‘सागा’ हॉटेलाच्या गुदांवाक उजो
म्हापशेंः बार्देश तालुक्यांत आयज सकाळीं उजो लागपाच्यो दोन घडणुको घडल्यो. पर्वरेच्या ‘घरान’ रेस्टॉरेंटाक उजो लागलो. जाल्यार नायकावाडो, कळंगुटे बांदकाम सुरू आशिल्ल्या ‘सागा’ हॉटेलाच्या गुदांवाक उजो लागलो. ‘घरान’ रेस्टॉरेंटाक लागिल्ल्या उज्या फाटल्यान घातपात आसूंये असो दुबाव आसा. सुदैवान ह्या दोनूय घडणुकांनी कोणाकूच दुखापत जावंक ना.
आयज मंगळारा सकाळीं सुमार 4.28 वरांचेर ‘घरान’ रेस्टॉरेंटाक उजो लागलो. हे विशीं म्हायती मेळटकच पर्वरी, पणजी आनी पिर्ळण उजो पालोवपी दळाच्या जवानांनी घडणूक सुवातेर वचून वरां भितर उजो नियंत्रणांत हाडलो. पूण तो मेरेन पुराय रेस्टॉरेंट लासून गोबर जाल्ले. हे रेस्टॉरेंट लांकूड आनी माडाची चुट्टां वापरून बांदिल्लें. हाका लागून उजो रोखडोच पातळ्ळो.
उजो पालोवपी दळाच्या कर्मचाऱ्यांनी रेस्टॉरेंटाच्या भितरले 11 गॅस सिलिंडर रोखडेच भायर काडले ताका लागून व्हड दुर्घटना टळ्ळी. ह्या उज्यांत सुमार 45 लाखांचें लुकसाण जालें. जाल्यार उजो पालोवपी दळान 30 लाखांचीं मालमत्ता वाटायली.
मजगतीं, नायकावाडो, कळंगुटे बांदकाम सुरू आशिल्ल्या ‘सागा’ हॉटेलाच्या गुदावाक उजो लागलो. आयज सकाळीं सुमार साडे स वरांचेर ही घडणूक घडली. स माळयेच्या हॉटेल इमारतीच्या तळमजल्यार आशिल्ल्या गुदांवाच्या कुडींत पेंट आनी हेर सामान दवरिल्लें. ह्या सामानाक अचकीत उजो लागलो आनी सगळ्यो वस्तू लासून गोबर जाल्यो.
हे घडणुकेची म्हायती मेळटकच उजो पालोवपी दळाचे स्टेशन अधिकारी दामोदर पेडणेकार हांच्या फुडारपणा खाला पिर्ळण, पर्वरी आनी म्हापशें उजो पालोवपी दळाच्या जवानांनी घडणूक सुवातेर वचून उजो नियंत्रणांत हाडलो. पूण तो मेरेन सगळ्यो वस्तू लासून गोबर जाल्ल्यो.
शॉर्ट सर्किटाक लागून हो उजो लागिल्ल्याचो अदमास आसा. ह्या उज्यांत लाखांचें लुकसाण जालें. पर्वरी आनी कळंगुटे पुलिसांनी दोनूय घडणुकांचो पंचनामो केलो. फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
