भांगरभूंय | प्रतिनिधी
भांगरभूंय । प्रतिनिधी
पर्वरीः चिखली (म्हापशें) हांका फुटल्ली पायपलायन सारकी केल्ल्यान पंदरा दिसां उपरांत पर्वरेच्या उदका शुद्धिकरण प्रकल्पाक तिळारीचें उदक येवपाक सुरवात जाली. फाटल्या कांय दिसां खातीर उदका खातीर वळवळे काडपी पर्वरकारांक आतां थाकाय मेळटली.
गिरी तें पर्वरी मजगतीच्या एक किलोमीटर लांब पायपलायनींतल्यान पर्वरी उदका प्रकल्पांत तिळारीचें उदक येताले. पंदरा दिसां आदी ती चिखली हांगा फुटल्ली. प्रकल्पाचे टांकयेत उदक येवपाचें बंद जाल्ल्यान पर्वरी वाठारांत बांदकाम खात्याच्या टॅन्कारांनी उदका पुरवण करताले. कांय लोकांक पदरमोड करून खाजगी टॅन्करांतल्यान उदक हाडचे पडटालें.
अस्नोडें प्रकल्पांतल्यान पर्वरे उदका पुरवण करताले. मात ताचे रेशनिंग सुरू केल्ल्यान तें केन्ना मेळत हाचो भरवसो नाशिल्ल्यान फाटल्या कांय दिसां सावन पर्वरे उदकाचो सामको उणाव जाल्लो. बिरेस्तारा सकाळी तिळारीचें उदक मेळपाक सुरवात जाली अशें बांदकाम खात्याच्या उदका पुरवण विभागाचो सहाय्यक अभियंतो दत्ताराम रायकारान सांगलें. 20 एमएलडी तांकीची टांकी भरराप 24 वरां लागतात. टांकी पुराय भरले उपरांत उदकाचें शुद्धिकरण करून शुकारच्यान ताची पुरवण लोकांच्या केली. हाचे फुडें उदका पुरवण नियमीत आसतली असें रायकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
