भांगरभूंय | प्रतिनिधी
वनस्पतीशास्त्र तज्ञ डेनियल डिसोझा हांचें मत
पणजीः पर्वरे वडाचें झाड लावपाक जी दुसरी कडेन सुवात सोदल्या ती ह्या झाडा खातीर योग्य न्हय. ही सुवात सकयल्या वाठारांत येता, आनी देखून जमनी पोंदा आशिल्ल्या उदकांत ताचीं मुळां कुसतलीं आनी कांपालार लायिल्ल्या वडा भशेन ताची दशा जातली. शास्त्रीय पद्दतीन हो वड दुसरी कडेन व्हेल्यार तो वाटावतलो अशें मत वनस्पतीशास्त्र तज्ञ डेनियल डिसोझा हांणी उक्तायलें.
पर्वरे खाप्रेश्वर देवळाचो वड ट्रान्सलोकेशन पद्दतीन हुमटून काडून तो दुसरे सुवातेर लावपाक उच्च न्यायलयान मान्यताय दिवन पर्वरेच्या फ्लायओव्हराच्या फुडल्या बांदकामा खातीर वाट मेकळी करून दिल्या. पूण ट्रान्सलोकेशन पद्दत कशी आसची आनी तें झाड खंय लावचें, जेणे करून तें जगतलें हाचेर तज्ञ डेनियल डिसोझा हांणी मत उक्तायलें. सद्या डेनियल कापांलार लायिल्लो वड पुनर्जिवीत करपा खातीर वावुरतात.
हे विशीं उलयातना डिसोझा हांणी सांगलें सरकारान आपल्या पयलींच्या चुकीतल्यान देख घेवन हो वड स्थलांतरीत करचो. गिरी हांगासरल्या शेतांत हो वड लायतले ती सुवात सामकीच सकयल्या वाठारांत येता आनी हे सुवातेत वड लावपाक जायना. तीन म्हयन्या भितर पावस येवपाचो आसा आनी जर ह्या शेतांत हो वड रोयलो जाल्यार उदकांत ह्या वडाचीं मुळां कुसतलीं आनी हो वड मरतलो. आमी फाटले चुकीतल्यान अणभव घेवपाक जाय. कापांल सुवातेर उदक खूब आशिल्लें. देखून थंय वड लावप हें सारकें नाशिल्लें अशें डेनियल हांणी सांगलें.
हांव मुख्यमंत्री तशेंच वेंचून आयल्ल्या प्रतिनिधीं कडेन मागतां की तांणी संबंदीत खात्यां कडेन संपर्क सादून आमचो सल्लो पावोवचो. हो वड उंचेले सुवातेर बरी सुवात पळोवन लावचो. पर्वरे खूबशो उंचेल्यो सुवातो आसात. ताका चड पयस व्हरपाची गरज ना, अशी सुचोवणी डेनियल हांणी केली.
तशेंच जेन्ना हो वड हालोवपाचें काम हातांत घेतले तेन्ना ताच्यो फांदयो हिसपा भायर बेनच्यो न्हय. तशेंच आतां गरमी येतली देखून ह्या वडाचेर चुडटां, मोवला वा नेटाची शेड घालून तो धांपून दवरचो. सारकी शास्त्रीय प्रक्रिया चालीक लावन हो वड ट्रान्सलोकेट केलो जाल्यार हो वड आमी वाटावपाक शकतात, अशें डेनियल हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
