भांगरभूंय | प्रतिनिधी
– चिंबल उड्डाण पुलाचें मुख्यमंत्री प्रमोद सावंत हांचें हस्तुकीं उक्तावणपणजीः पर्वरे उड्डाण पुलाचें काम फुडल्या दोन वर्सा भितर पुराय जातले. जाल्यार मडगांव वेस्टर्न बायपासाचें काम डिसेंबर मेरेन पुराय जातले. ह्या कामांक लागून लोकांक त्रास जाता हाची म्हाका जाणीव आसा. पूण बऱ्या फुडारां खातीर लोकांनी मात्सी कळ सोसची, असो उलो मुख्यमंत्री प्रमोद सावंत हांणी मारला.
चिंबलच्या राष्ट्रीय म्हामार्गा वयल्या उजव्या वटेनच्या उड्डाण पुलाचें उक्तावण मुख्यमंत्री डॉ. प्रमोद सावंत हांचें हस्तुकीं जाले. ह्या पुलाच्या उक्तावणा वेळार मुख्यमंत्री उलयताले. ह्या वेळार थळावे आमदार रुडोल्फ फर्नांडीस, पणजेचे म्हापौर रोहीत मोन्सेरात, जिल्हाे पंचायत वांगडी गिरीश उस्कयकार, चिंबलचे सरपंच संदीप शिरोडकार आनी हेर मानेस्त हजर आशिल्ले.
चिंबला राष्ट्रीय म्हामार्गा वयलें उड्डाण पुलाचें बांदकाम मंगळार मेरेन पुराय जावचे ही डेडलायन दिल्ली. हे डेडलायनी प्रमाण वेळा भितर दनपारा 3 वरांचेर काम पुराय जावन सांज वेळार ताचे उक्तावण जालें. कार्तिकी एकदास हो शुभ दीस आशिल्ल्यान आमदार रुडोल्फ फर्नांडीस हांका सकाळीं 11.00 वरांचेर फोन करून तांकां ह्या पुलाच्या उक्तावणाची बातमी दिली, अशे मुख्यमंत्र्यांनी सांगलें.
सुमार 42 कोटी खर्च करून चिंबलच्या उड्डाण पुलाचो एक पांवडो तयार जाला. जाल्यार चिंबल पुलाचो दुसरो पांवडो आसा तो स म्हयन्या भितर पुराय जातलो. सकयल्यान वचपी येरादारी आडावन हे पुलाचें काम हातांत घेवप शक्य नाशिल्ल्यान दोनय वटेन वचपी पुलाचें काम करप शक्य जाले ना, अशी म्हायती मुख्यमंत्र्यांनी दिली.
पुलाचें उक्तावण केले उपरांत नव्या उड्डाण पुला वयल्यान एम्ब्युलेन्सींक वाट दिवपा खातीर मुख्यमंत्री माचये वेल्यान देंवले आनी एम्ब्युलन्सींक वाट करून दिली. हे विशीं उलयतना मुख्यमंत्र्यांनी सांगलें, ही एम्ब्युलेन्स उड्डाण पुला वयल्यान गेल्ल्यान तिची 8 ते 10 मिण्टां तरी वाटवल्या आसतली. एम्ब्युलेन्सी खातीर वेळ महत्वाचो, ना जाल्यार जंक्शनाचेर गचमुड्डीक लागून ती आडकून उरपाची, अशें मुख्यमंत्र्यांनी सांगलें.
2012 पयली फोंडे सावन पणजे येतना पोरण्या रायबंदर रस्त्याचो वापर करपाचो पडटालो. देखून आपल्या थळार पावपा खातीर 1 वर लोकांक कळाव जातालो. 2012 उपरांत कदंब बायपास बांदून सगळी येरादारी सुरळीत जाली. फोंडे, दिवचले, सत्तरी खातीर कनेक्टीव्हीटी नासली ते काम बायपासाक लागून पुराय जाला, अशे मुख्यमंत्र्यांनी म्हणलें.
सांताक्रुझचे आमदार रुडोल्फ फर्नांडीस हांणी सांगलें, हे सुवातेर अपघातांत बरेच जाण मरण पाविल्ल्यान जायत्या जाणांच्यो भावना आसात. फक्त सांताक्रुझ मतदारसंघ न्हय जाल्यार सरभोंवतणीच्या मतदारसंघा खातीर ही खोशयेची गजाल आसा.
जेन्ना मामी ह्या मतदारसंघाची आमदार आसली तेन्ना ह्या पुला खातीर फक्त दोनच खांबे उबारिल्ले. हो पूल तसोच उरपाचो आसलो. पूण भाजप सरकारान हो पूल परतून सुरू करून मामीचें सपन पुराय केलें. मुख्यमंत्र्यांनी जायते प्रकल्प हातांत घेतले आनी ते पुराय केले. मुख्यमंत्र्यांच्या लोकहिता खातीर हातूंत लक्ष घालून हो उड्डाण पूल पुराय केला, अशी भावना रुडोल्फ हांणी उप्रासली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
