भांगरभूंय | प्रतिनिधी
पुलीस, बार्देस जोड मामलेदार आनी कंत्राटदारा आड गुन्यांव नोंद करपाची मागणी
पणजी : कसलेच तरेची सुचोवणी दिनासतना पुलीस बंदोबस्तांत पर्वरेचें श्रीखाप्रेश्वर देवूळ मध्यानरातीं काडपाची कंत्राटदार आनी प्रशासनाची कृती बेकायदेशीर आसा. जनतेच्यो धर्मीक भावना दुखोवपी आसा. हे बेकायदो कृती खातीर बार्देशचे जोड मामलेदार, पर्वरी पुलीस अधिकारी आनी कंत्राटदारा आड गुन्यांव नोंद करपाची मागणी करीत कॉंग्रेसचे उपाध्यक्ष सुनील कंवठणकार हांणी रायबंदरच्या गुन्यांव फांट्या कडेन कागाळ केल्या.
भारतीय न्याय संहितेचें कलम २९८ (श्रद्धेचें स्थान आशिल्ले वास्तूक लुकसाण करप), कलम २९९ (मुद्दाम जनतेच्यो भावना दुखोवप), कलम ३ (५)/६१ (फौजदारी स्वरूपाचें कटकारस्थान), कलम १९८ ( सरकारी कर्मचार्यां कडल्यान कायद्याचो भंग) आनी कलम ३२४ (धोको निर्माण करपी कृती) खाला गुन्यांव नोंद करपाची मागणी कागाळींत केल्या.
खाप्रेश्वर देवूळ मोडिल्ल्यान फकत हिंदूंच्योच न्हय, तर थंयच्या सगळ्या थळाव्यांच्यो भावना दुखवल्यात. कारण तांचीय ताचेर श्रद्धा आशिल्ली. आपली श्रद्धा आशिल्ल्या देवाची देवळांत वचून पुजा करप हो धर्मीक न्हय तर संविधानान दिल्लो मोलादीक अधिकार. कसलीच नोटीस वा सुचोवणी दिनासतनाच २ ते ३ मार्च मजगतींच्या काळांत बार्देशचे जोड मामलेदार, कंत्राटदार आनी पुलीस अधिकार्यांनी संगनमतान देवूळ मोडपाची बेकायदो कृती केल्या, अशें कंवठणकार हांणी कागाळींत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
