भांगरभूंय | प्रतिनिधी
गोंय मनीस हक्क आयोगान मागलो अहवाल
पणजीः पर्वरी स वर्सां पिरायेचे चलयेचेर लैंगिक अत्याचार प्रकरणांतल्या दुबाविताच्या कुटुंबाक घर खाली करपा संबंदी पंचायतीन धाडिल्ले नोटिशीची गोंय मनीस हक्क आयोगान आपूण जावन दखल घेतल्या. ताणें सुकूर पंचायतीच्या सचिवाक 6 जानेवारी मेरेन अहवाल सादर करपाचो आदेश दिला.
बार्देश तालुक्यांतल्या चलयेचेर लैंगीक अत्याचार जाल्ल्याची धक्को दिवपी घडणूक मंगळारा उजवाडाक आयली. ह्या प्रकरणांत ल्हान भुरग्यांक शाळेत सोडपी खाजगी वाहनाचो ड्रायव्हर दुबावीत अल्लाबक्ष सय्यदाबादे उर्फ बक्षी (46) हाका पर्वरी पुलिसांनी अटक केल्या. हाचे उपरांत दुबाविताच्या कुटुंबाक कांय लोकांनी गांवांत रावपाक खर विरोध केले उपरांत थळाव्या पंचायतीन बुधवारा ‘20 कलमी कार्यावळ’ वाठारांतल्या ह्या कुटुंबाक सात दिसां भितर घर खाली करपाची अधिकृत नोटीस धाडल्या.
ही कागाळ भुरग्यांच्या लैंगीक अत्याचाराच्या गंभीर गुन्यांवकारी प्रकरणां कडेन संबंदीत आसा अशें पंचायतीन हे नोटीसांत सांगलां. जाका लागून सामान्य लोकां मदीं भंय, अशांतताय आनी असुरक्षीतताय निर्माण जाल्या. कसलीच अप्रिय घडणूक टाळपा खातीर आनी कायदो आनी सुवेवस्था सांबाळपा खातीर कुटुंबाक घर खाली करपाचो आदेश दिला. उल्लेख केल्ली नोटीस मेळ्ळे उपरांत 7 दिसां भितर घर खाली केले ना जाल्यार खर कायदेशीर कारवाय करतले अशीय शिटकावणी दिल्या.
मजगतीं, गोंय मनीस हक्क आयोगान आपूण जावन हाची दखल घेतल्या. आनी सुकूर पंचायतीच्या सचिवा कडेन 6 जानेवारी मेरेन अहवाल मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
