भांगरभूंय | प्रतिनिधी
पर्वरीः पर्वरी रायझिंग वतीन आयोजीत ‘नोमोझो’ ह्या उपक्रमाची सातवी आवृत्ती आयतारा, 11 जानेवारी 2026 दिसा आयोजीत केल्या. ह्या उपक्रमाच्या निमतान छत्रपती शिवाजी महाराज मार्ग नागरिकांक उक्तो करून एक दीस वाहन मुक्त करतले आनी फिटनेस, खेळ, संस्कृताय, दायज, नवकल्पना आनी नागरिकांचो सहभाग हांचेर आदारिल्ले वेगवेगळे उपक्रम घडोवन हाडटले.
फाटल्या कांय वर्सांत ‘नोमोझो’न सगळ्या पिरायेच्या गटांतल्या नागरिकांक, थळाव्या वेवसायिकांक आनी कलाकारांक एकठांय हाडपी एक बरो उपक्रम म्हणून आपली वळख निर्माण केल्या.
पर्यटन मंत्री रोहन खंवटे हांणी म्हणलें, नोमोझो हो नागरिकांच्या सहभागांतल्यान चालीक लायिल्लो उपक्रम आसून ती पर्वरेच्या लोकां खातीर एक म्हत्वाची भौशीक कार्यावळ थारल्या. दर वर्सा वाडत वचपी प्रतिसादाक लागून भलायकेन भरिल्ल्या जिणे पद्दतीक चालना दिवपी, सृजनशीलतेक वाव दिवपी आनी सगळ्यां खातीर उक्ती आशिल्ल्या अशा भौशीक कार्यावळींची गरज आसा. नोमोझोची सातवी आवृत्ती नागरिकांक चड गिरेस्त आनी अर्थपूर्ण अणभव दितली.
नोमोझो 7.0 त किड्स झोन, आर्ट झोन, अॅस्ट्रोनॉमी झोन, हेरिटेज झोन, परफॉर्मन्स आनी डान्स झोन, मार्शल आर्ट्स झोन, हेल्थ झोन, युथ झोन, आयटी आनी सायन्स झोन, फिटनेस झोन, बॉक्सिंग झोन, इन्फ्लुएंसर झोन आनी अंदूं पयलेंच फावट आस्पावीत केल्लो कराओके झोन अशे वेगवेगळे विभाग आस्पावीत करतले. कराओके झोनाक लागून नागरिकांक माचयेर येवन संगीताचो आस्वाद घेवपाची संद मेळटली.
नोमोझोचो मुखेल आयोजक निनील डीसोझा हांणी सांगलें, दर वर्सा नोमोझोक चड समुदाय आदारीत आनी नवनिर्माण करपाचो यत्न करतात. ह्या वर्सा दरेका झोनांत फिटनेस, तंत्रगिन्यान, दायज आनी मनरिजवणे पसून कितें तरी नवें अणभवपाक मेळटलें. नोमोझो हो थळाव्या प्रतिभेचो सोद घेवपाचो, कितें तरी नवें शिकपाचो आनी समाजीक संबंद घटमूट करपाचो एक उपक्रम.
खेळां उपक्रम जशें, बॉक्सिंग मॅची, भलायकी तपासणी, खगोलशास्त्र सत्रां, सांस्कृतीक कार्यावळी, तंत्रज्ञान प्रदर्शनां आनी लायव्ह मनरिजवण सारकिल्या कार्यावळींनी नोमोझो 7.0 हो अणभव, सहभाग आनी खोशेन भरिल्लो उत्सव आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
