पर्वरी येतलो टावन स्क्वेअर प्रकल्पः पर्यटन मंत्री

भांगरभूंय | प्रतिनिधी

भांगरभूंय । प्रतिनिधी
पणजीः सुमार‌ 120 कोटी खर्च करून पर्वरी सुमार‌ 11 हजार‌ चौखण मीटरांत टावन स्केअर प्रकल्प येतलो. देशांत पयलेच खेपे हो असो प्रकल्प गोंयांत येता. ह्या प्रकल्पा वरवीं उक्ती सुवातींची उदरगत करुन पर्यटका खातीर मनरीजवणीच्यो कार्यावळी घडोवन हाडटाले. मार्च 2026 मेरेन हो प्रकल्प पुराय जावपाची आस्त आसा, अशें पर्यटन मंत्री रोहन खंवटे हांणी सांगलें.
पणजे पर्यटन भवनांत जाल्ले पत्रकार परिशदेत मंत्री रोहन खंवटे उलयताले. ह्या वेळार पर्यटन खात्याचे संचालक केदार नायक, गोंय पर्यटन उदगरत म्हामंडळाचे वेवस्थापकी संचालक कुलदीप आरोलकार आनी हेर अधिकारी हाजीर आशिल्लें.
ह्या वेळार उलयतना मंत्री रोहन खंवटे हांणी सांगलें, बुधवारा जाल्ले मंत्रीमंडळ बसकेंत पर्यटन खात्याच्या तीन प्रकल्पांक मान्यताय मेळ्ळ्या.
फाटल्या तीन वर्सा भागधारकां वांगडा चर्चा करून गोंयची पुर्नबांदणी आनी दर्या पलतडी गोंय दाखोवपा खातीर आमी साधन सुविधा तयार करपाचेर भर दिलां. आनी गोंयचो इतिहास तशेच शिवाजी महाराजांचे दायज राज्याक जोडपाचो यत्न केलां. देखून भांडवल निवेश येवजणे खाला टावन स्क्वेअर आनी शिवाजी महाराज डिजीटल संग्रहालय हे दोन प्रकल्प फावो जालां.
आमी जेन्ना संसार भर भोंवले तेन्ना आमका न्युयोर्क टायम्स स्क्वेअर साकिल्ली संकल्पना दिसून आयली. जंय उक्त्या सुवातींचेर लोक एकठांय येवन मनरीजवणीचो आस्वाद घेतात ताका टावन स्क्वेअर संकल्पना म्हणटात. हे देशांतले पयले टावन स्क्वेअर गोंयांत येवपाचे आसा. पर्वरी शार हे पुराय गोंयच्या मध्यात आसा आनी पर्यटक तशेंच थळाव्यांक सोयीचे थारता म्हूण पर्वरी हो टावन स्क्वेअर आमी हाडपाचो निर्णय घेतला, अशें खंवटे हांणी सांगलें.
पर्वरी तीन बिल्डींग कुशींकच्या उक्ते सुवातेंत 11 हजार चौखण मीटर जमीनींत हो प्रकल्प येवपाचो आसा. 18 टक्के जीएसटी धरून ह्या प्रकल्पांक 120.97 कोटी इतलो खर्च येतलो. हातूंत केंद्राचो वांटो 90.70 कोटी जाल्यार राज्यांचो 35.32 कोटी आसा. मार्च 2026 मेरेन हो प्रकल्प पुराय जावपाची अपेक्षा आसा आनी हो पुराय शाश्वत प्रकल्प आसा, अशीं म्हायती खंवटे हांणी दिली.
ही प्रस्तावीत सुवात वेवसायीक 2 आनी वेवसायीक 3 अशी अधिसुचीत करून वसणूक बांदपा खातीर गोंय गृहनिर्माण म्हामंडळाक दिल्ली. विरोधात आसतना हांवेंन आक्षेप घेवन ते वेळाचे मुख्यमंत्र्याक सांगले हे सुवातेर येरादारी चड आसा देखून हे सुवातेर चेपण घालचे न्ही. उपरांत मुख्यमंत्री डॉ. प्रमोद सावंत, गृहनिर्माण मंत्री सुदीन ढवळीकार हांणी समजून घेवन हो निर्णय फाटी घेतलो आनी पर्यटन खात्याक जमीन दिली, अशें खंवटे हांणी म्हणलें.
तशेंच स्वदेश दर्शन 2.0 ग्रामिण सर्किट सकयल आमी पोंबुर्फा झरीचे सोबीतीकरण करून थंय गरजेची सुविधा उबारून पर्यटन थळ करपाचो निर्णय मंत्रीमंडळान घेतलां. पोंबुर्फा झरी बरोबर माली आनी तोर्डा वाठारांतल्या पोंयो उदरगत करून क्रिक एक्सप्रियन्स प्रकल्प आमी राबयतात. ह्या पोंयाक भेट दिवन पर्यटकांक पक्षी पळोवप, नुस्ते गरोवप सारकें गजालींचो आस्वाद घेवपाक मेळटलो आनी थळाव्यांक आर्थिक लाव मेळटलो, अशीं म्हायती खंवटे हांणी दिली.