भांगरभूंय | प्रतिनिधी
भांगरभूंय । प्रतिनिधी
पर्वरीः पर्वरीच्या कांय वाठारांत ह्या दिसांनी पियेवपाच्या उदकाचो खण उणाव जाला. हावसिंग बोर्ड कॉलनी आनी ओव्हल पार्क वाठारांत फाटल्या चार दिसां सावन नळाक उदक येना. लोकांक पदरमोड करून उदकाचे टॅन्कर हाडचे पडपाक लागल्यात. पर्वरी आशिल्ल्या उदका साठवणूक टॅन्कांत फाटल्या चार दिसां सावन तिळारीच्या उदकाची पुरवण जायनाशिल्ल्यान लोकांक उदक दिवप शक्य जालें ना अशें बांदकाम खात्याच्या उदका पुरवण विभागाचो सहाय्यक अभियंतो डी रायकार हाणे सांगलें.
सध्या पर्वरीक अस्नोडें उदका शुद्धिकरण प्रकल्पांतल्यान उदका पुरवण चल्ल्या. थंयच्या उदकान ओव्हरहेड टाकी भरले उपरांत नळांक उदक सोडटात. ताका लागून उदक पुरवण करपाची फिक्स असो वेळ ना अशें रायकारान सांगलें. तिळारीच्यान केन्ना उदका पुरवण पयलीं भशेन सुरू जातली, अशें विचारलें तेन्ना कांय कल्पना ना अशें ताणे सांगलें.
उदकास्रोत खात्याचो मुख्य अभियंतो प्रमोद बदामी हाचे कडेन चवकशी केली तेन्ना तांणी तिळारी उदका पुरवण विभागाच्या वेवस्थापना कडेन कांय प्रश्नां विशीं चर्चा चल्ल्या अशें सांगलें. कसले प्रश्न आनी ते केन्ना सुटावे जातले, अशें विचारलें तेन्ना ताणे जाप दिली ना. पर्वरींत कोट्यांनी रुपया खर्च करून उदका शुद्धिकरण प्रकल्प उबारला. पर्वरी वाठार निमण्या टोका कडेन आशिल्ल्यान अस्नोडें प्रकल्पाचें उदक थंय मेरेन सारकें पावना अशे हावसिंग बोर्ड कॉलनींतल्या लोकांनी सांगलें.
मजगतीं, पर्वरी उदका शुद्धिकरण प्रकल्प सुरू जालो तेन्ना दिसाक उण्यात उणी तीन तें चार वरां उदक मेळटली अशी पर्वरकारांक आस्त आशिल्ली. मात उदका प्रकल्प आसून लेगीत तांकां गिमाळ्यांत उदका खातीर सध्या त्रास काडचे पडटात. वर्वरी वाठारांत बांयो नात. ताका लागून तांकां नळाच्या उदकाचेरूच निंबून रावचें पडटा. तिळारी उदका विभागा कडेन आशिल्ले प्रश्न सुटावे करून उदका पुरवण सुरू करची अशी लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
