भांगरभूंय | प्रतिनिधी
पणजी ः आल्तो- पर्वरी ऑनलायन आयपीएल बेटिंग करपी तेलंगणाच्या तिगुल्ला श्रीनिवास (39), गड्डला किरण कुमार (37) आनी अनंथपुरम श्रावण कुमार (36) ह्या तिगांक अटक केली. तांचें कडल्यान 1.80 लाखांचें सामान जप्त केलां.
काल आयपीएलांत मुंबय आनी लखनौ हांचे मदीं मॅच जाल्ली. ही मॅच लखनौन 12 धांवड्यांनी जिखली. मजगतीं, हे मॅचीचेर 8.45 ते 10.50 मेरेन बेटिंग चलताली अशीं म्हायती सूत्रांनी पुलिसांक दिली. म्हायतीचेर आदारून गुन्यांव फांट्याच्या पंगडान मध्यान रातीं ते सुवातेर धाड घालून दुबावितांक ताब्यांत घेतले. उपरांत चवकशी करुन तांकां अटक केली.
ह्या वेळार तांचे कडल्यान 3 मोबायल फोन, एक लॅपटॉप, आनी कांय गेमींग उपकरणांय मेळून 1.80 लाखांचें सामान जप्त केलां. ह्या प्रकरणांत गुन्यांव फांट्याचे निरिक्षक तुषार लोटलीकार हांच्या मार्गदर्शना खाला सहाय्यक उपनिरिक्षक संतोष गोवेकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
