भांगरभूंय | प्रतिनिधी
सरकारान जारी केला व्हॉट्सअॅप नंबर; अॅडव्होकेट जनरलाची न्यायालयांत म्हायती
भांगरभूंय । प्रतिनिधी
पणजीः पर्वरी उड्डाण पुला संबंदांत कोणाकूय कसलेय तरेच्यो अडचणी आसल्यार त्यो नोंद करपाक मेळच्यो हे खातीर सरकारान 8380081177 हो व्हॉट्सअॅप नंबर जारी केला. ताचेर लोकांनी 50 परस उण्यां उतरांनी संदेश धाडून आपली समस्या मांडची. हो संदेश संबंदीत खात्याच्या अधिकाऱ्यां कडेन धाडून समस्या सुटावी करतले, अशी म्हायती अॅडव्होकेट जनरल देविदास पांगम हांणी गोंयांतल्या मुंबय उच्च न्यायालयांत दिली. मजगतीं, कांय उपाय येवजण बाकी आशिल्ल्यान न्यायालयान फुडली सुनावणी 13 जानेवारीक दवरल्या.
वकील मोझेस पिंटो हांणी उच्च न्यायालयांत जनहीत याचिका दाखल केल्या. तातूंत तांणी पर्वरेच्या एलिव्हेटेड कॉरिडोराच्या बांदकाम प्रकल्पाक लागून येरादारी कोंयडी तशेंच लोकांची रस्तो सुरक्षा आनी आपत्कालीन सेवेंत आडखळ जाता, असो दावो केला. तशेंच गोंयांतल्या विवीध मार्गां वयल्या अपघाती मरणांचे संख्ये विशीं लेगीत हुस्को उक्तायला.
मजगतीं, अॅडव्होकेट जनरल देविदास पांगम हांणी संबंदीत खात्याच्या अधिकाऱ्यांची बसका घेवन उपाय येवजण आंखपाचे निर्देश दिल्ले. तातूंत तात्पुरते रस्त्यांचें हॉटमिक्स करप, येरादारी कोंयडी जावची न्हय हे खातीर येरादारी मार्शल दवरप, धुल्ल प्रदुशण टाळचे खातीर रस्त्याचेर उदक मारप, आपत्कालीन सेवे खातीर दोन अॅम्ब्युलन्सी, तशेंच हेर उपाय येवजण लागू करपाक सांगिल्लें. ते प्रमाण, उपाय येवजणे विशींचो कृती अहवाल न्यायालयांत सादर केलो. तातूंत 60 ते 70 टक्के उपाय येवजणो लागू केल्ल्याचें म्हणिल्लें.
मजगतीं, ह्या प्रकरणांत मंगळारा सुनावणी जाली. तेन्ना लोकांक पर्वरी उड्डाण पुलाच्या कामाक लागून कसलेय तरेची आडखळ आसल्यार त्यो नोंद करपाक मेळच्यो, हे खातीर सरकारान 8380081177 हो व्हॉट्सअॅप नंबर जाली केला. तशेंच त्या नंबराचेर लोकांनी 50 परस उण्या उतरांनी संदेश धाडून समस्या मांडची, अशी वेवस्था केल्या, अशी म्हायती दिली. ते उपरांत संबंदीत अधिकारी त्यो समस्या सोडयतले. मजगतीं कांय उपाय येवजण्यो बाकी आसात, त्यो पुराय करतले, अशी म्हायती अॅडव्होकेट जनरल देविदास पांगम हांणी दिली. मजगतीं, कांय वाठारांनी उदकाची पायपलायन फुट्टा हे खातीर थंय हॉटमिक्स करपाक आडखळ येता. ती पायपलायन कुशीक काडून हॉटमिक्स करपाचें काम पुराय करतले, अशी म्हायती कंत्राटदारान दिली.
घाणयाऱ्या उदकाचेर उपाय येवजण करपाक मागल्या मुजत
उड्डाणपुलाच्या वाठारांतली घाणयाऱ्या उदकाची पायपलायन तुंबल्या. ताका लागून वाठारांत घाण मारतली तशेंच दुयेंसां आनी हेर समस्या उप्रासतली, असो दावो पर्वरी वाठारांतल्या लोकांनी केला. तशेंच हाचेर उपाय येवजण केली ना जाल्यार पावस पडले परांत व्हड समस्यांक फुडो करचो पडटलो, असो हुस्को उक्तावन न्यायालयांत हस्तक्षेप याचिका दाखल केल्या. हे संहंदांत कंत्राटदार अधिकाऱ्यां वांगडा बसका घेवन उपाय येवजण काडचे खातीर सरकारान चार सप्तकांची मुजत मागली. त्या वेळार सविस्तर आराखडो न्यायालयांत सादर करतले, अशी म्हायती अॅडव्होकेट जनरल देविदास पांगम हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
