भांगरभूंय | प्रतिनिधी
डेडलायनीच्या 5 म्हयन्यां पयलीं काम जातलें पुराय
भांगरभूंय । प्रतिनिधी
पणजी : पर्वरी उड्डाण पुलाच्या खांब्यांचें काम 70 टक्के पुराय जालां. खांब्यांचेर काँक्रिटाचे 2 स्पॅन (लादयो) बसोवन जाल्यात. डेडलायनीच्या 5 म्हयन्यां आदींच उड्डाण पुलाचें काम पुराय जातलें. पावसांत लेगीत काम चलतले, अशी म्हायती आरआरएसएमचे उपाध्यक्ष राजदीप भट्टाचार्य हांणी दिली.
पर्वरी उडडाण पूल पुराय करपाची डेडलायन ऑक्टोबर 2026 आशिल्ली. जे गतीन काम सुरू आसा ते पळयल्यार मार्च 2026 मेरेन काम पुराय जातलें, असो विस्वास उपाध्यक्ष राजदीप भट्टाचार्य हांणी उक्तायलो. लायटी तशेंच हेर संबंदीत कामांचो हातूंत आस्पाव ना. पुलाचें उक्तावण तशेंच कशे तरेन येरादारीक उक्तो करपा विशींचो निर्णय सरकाराचेर निंबून आसा, अशें तांणी सांगलें.
या उड्ड्ण पुलाक 88 खांबें आसात. 88 तल्या 70 खांब्यांचें काम पुराय जालां. खांब्यांचेर 88 लादयो (स्पॅन) घालचे पडटले. 2 स्पॅन खांब्यार घातल्यात. आतां पावसा पयली खांबें आनी लादयो घालपाचें काम पुराय करपाचो यत्न आसा. शक्य आसा तीं कामां पावसांत करतले.
स पदरी उड्डाण पुलाच्या कामाची निविदा राजस्थानाचे राजेंद्र सिंग भांभू इन्फ्रा (आरआरएसएम) कंपनीक मेळ्या. सांगोल्डा जंक्शन ते मॅजेस्टीक हॉटेल (पर्वरी) मेरेन हो उड्ड्ण पूल आसतलो. खांबें उबारपा खातीर सर्वेक्षण आनी जमीन योग्य तरेन तयार करपाक खूब वेळ लागता. हें काम पुराय जालां. तशेंच कामाचें वेवस्थापन करतना विजेचे खांबें, उदका पुरवण करपी पायपलायन हाचो विचार करचो पडटा. हे विशींचें वेवस्थापन पुराय जालां. हाका लागून ह्या फुडल्या कामांक उशीर लागचो ना. खांब्यांचेर घालपी लादयो (स्पॅन) रातच्या वेळार हाडटले. हाका लागून येरादारेची कोंयडी जावपाचें प्रमाण मर्यादीत उरतलें, अशें तांणी सांगलें.
640 कोटींच्या उड्डाण पुलाचें काम दोन वर्सांत पुराय करपाची अट सरकाराचे निविदेंत आशिल्ली. हेर बोलीदारां परस आरआरएसएम कंपनी 25 टक्के उणी बोली सादर केल्यान तांकां कामाची निविदा फावो जाली. बुन्यादीचेर चड खर्च जाल्ल्यान प्रकल्पाचो खर्च आनीक 50 कोटींनी वाडपाचो अदमास आसा. खांब्यां खातीरची बुन्याद पयलीं 25 मिटर खोल करपाचो प्रस्ताव आशिल्लो. प्रत्यक्षांत ती 40 मिटर खोल करच पडली. हाचेर खर्च वाडलो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
