भांगरभूंय | प्रतिनिधी
-मुख्यमंती, सचिवांचे हाजिरेंत घेतले नियाळ बसका
पणजी: पर्वरी उबारपी उड्डाणपुलाच्या बांदकामाक सुरवात जातली. काम सुरू जाले उपरांत येरादारी मार्गांतले बदल तशेंच हेर म्हत्वाच्या गजालींचो नियाळ घेवपाक फुडल्या 10 दिसांत मुख्यमंत्री डॉ. प्रमोद सावंत आनी मुख्य सचिवांच्या हाजिरेंत बसका घेतले, अशी म्हायती पर्यटन मंत्री रोहन खंवटे हांणी दिली.
शेनवारा तांणी पुलाच्या कामां विशीं नियाळ बसका घेतली. बसकेक विवीध खात्यांचे अधिकारी हाजीर अाशल्ले. ह्याय वेळार कंत्राटदारांनी पुलाच्या बांदकाम आखड्याचें सादरीकरण केले.
पुलाचें काम बेगिनूच सुरू जातलें ही बऱ्याची गजाल आसा. पूण काम सुरू जाले उपरांत येरादारी ज्या मार्गान घुंवडायतले तो रस्तो खूब अशीर आसा. थंय एकादे व्हड वाहन बंद पडल्यार दोनूय वटांनी येरादारीची कोंयडी जावपाची शक्यताय आसा. ओ- कोकेरो जंक्शना वयल्यान एका वरांत सादारण 25 हजार वाहनां वतात. पर्यटन हंगामांत जाल्यार चड गर्दी आसता. तेन्ना थंय पर्यायी हेर मार्गा वयल्यान येरादारी घुंवडावपाचो विचार सुरू आसा. कांय दीस वाहनां घुंवडावन येरादारी सुरळीत जाता वा ना हाची तपासणी करतले. उपरांतूच त्या मार्गाची निवड करतले, अशें खंवटे हांणी सांगलें.
उड्डाण पूल बांदकामांत राष्ट्रीय म्हामार्ग प्राधिकरण आनी हेर विवीध खात्यांनी समन्वय अासप गरजेचें. सध्या होच एक म्हत्वाचो मुद्दो थारता. कंत्राटदार, प्राधिकरण तशेंच हेर खात्यांत कसलाेच गोंदळ आसपाक जायना. ते खातीरूच आमी वेळावेळार नियाळ बसका घेतले. ह्या कामा खातीर सादारण अडेज वर्सांचो काळ लागतलो. म्हापशें पर्वरी रस्त्या वयली येरादारीची कोंयडी पळयल्यार थंय उड्डाणपूल आसप गरजेचें जाला. ते खातीरूच आमी केंद्रा कडल्यान तो मंजूर करून घेतला. काम सुरू आसतना लोकांक उण्यांत उणो त्रास जावचो हे खातीर आमी यत्न करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
