भांगरभूंय | प्रतिनिधी
भांगरभूंय । खबरां मेज
पणजीः पर्वरी मतदारसंघांत नव्या वेगवेगळ्या उदरगत उपक्रमांचे पर्यटन मंत्री रोहन खवंटे हाचे हस्तुकीं उक्तावण जालें. ह्या वेळार जिल्हो पंचायत वांगडी कविता गुपेश नायक, पेन्ह द फ्रान्साचे सरपंच स्वप्नील चोडणकार आनी पंच वांगडी हाजीर आशिल्ले.
पेन्ह द फ्रान्स पंचायत कार्यालया सामकार आशिल्ल्या फुटसल मैदाना खातीर शेनवारा बुन्यादी फातोर बसयलो. येरादारी सुविधे खातीर हावसिंग बोर्ड मार्केटा लागीं रिक्शा स्टॅण्ड उबारला. ह्या शिवाय गाडगे महाराज सभाघरा लागीं क्लॉक टॉवरा कडेन एक मेकळी सुवात लोकां खातीर उक्ती केल्या. सर्व्हिस रोडार सिनियर सिटिझनां खातीरच्या पार्काचो बुन्यादी फातोर बसयलो.
मुख्यमंत्री डॉ प्रमोद सावंत हांच्या विकसीत भारत, विकसीत गोंय हे संकल्पने प्रमाण लोकांक जाय त्यो सुविधा मेळटल्यो हाची सरकार गवाय दिता. पर्वरींत खासा मुळाव्यो सुविधा वाडोवपा खातीर कामां चल्ल्यांत लोकांक पार्किंग आनी हेर सेवा दिवपा कडेन आमी लक्ष दिलां. पर्वरीहें शाश्वत उदरगत आनी लोक कल्याणा खातीरएक मॉडेल शार म्हणून उदयाक येता. सुविधा आनी सक्रिय सामुदायीक सहभाग वाडोवपाचेर आमी भर दिला अशें रोहन खवंटे हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
