भांगरभूंय | प्रतिनिधी
भाव- भयण जखमी, चालक पावलो राजस्थान
भांगरभूंय । प्रतिनिधी
म्हापशें : लिंगाभाट, पर्रा ‘हीट अॅण्ड रन’ अपघातांत रेंट अ कॅब थार जिपीन दुचाकीक नेटाचो धपको दिल्ल्यान रेवोडें- बार्देसची निकिता चव्हाण (21) आनी नरेंद्र चव्हाण (13) भाव- भयण गंभीर जखमी जाले. तांचेर जीएमसींत उपचार चालू आसात.
अपघाता उपरांत जीप चालक करण गुप्ता राजस्थानाक पळून गेला. ताका चवकशे खातीर हाजीर रावपाची नोटीस म्हापशें पुलिसांनी धाडल्या.
हो अपघात सोमारा 17 नोव्हेंबराक सकाळीं 7.30 वरांच्या सुमाराक जालो. जखमी निकिता ही बागा कळंगूटे कामाक वताली. जाल्यार नरेंद्र हो तिचो ल्हान भाव शाळेक वतालो. कळंगूटे सावन म्हापशेंचे दिशेन धोफरायत आयिल्ले रेंट अ कॅब थार जिपीन (जीए 03 व्ही 3033) उरफाटे दिशेन वचपी जखमींचे अॅक्टिव्हा स्कुटरीक नेटाचो धपको दिलो. ह्या धपक्यान दोगांय उसळून रस्त्याचेर पडलीं आनी गंभीर जखमी जालीं.
अपघाता उपरांत दुबावीत जीप चालकान जखमींक वैजकी मजत दिवचे बदला घडणुकेचे सुवाते वयल्यान थार जिपी सयत पळ काडलो. उपरांत लोकांनी जखमींक अॅम्ब्युलन्सींतल्यान म्हापशें जिल्हो हॉस्पिटलांत आनी उपरांत फुडल्या उपचारा खातीर जीएमसींत दाखल केले. दोगांच्याय पांयांक गंभीर दुखापक जाल्या.
मजगतीं, अपघाताक कारण थारिल्ली जीप मोपा विमानतळा लागसार रस्त्याचे कुशीक सांपडली. पुलिसांनी ती जीप जप्त केली. अपघाता उपरांत दुबावीत जीप चालक करण गुप्ता आपल्या हेर सांगात्यां सयत थेट मोपा विमानतळाचेर गेलो. थंय ताणें अपघात जाल्ली जीप पार्कींग सुवातेचेर पार्क केली आनी ते विमानांतल्यान थेट राजस्थानाक गेल्ल्याचें पुलीस चवकशेंत कळ्ळें.
दुबावीत गुप्ता हाणें ती जीप कळंगूटेच्या एका रेंट अ कॅब आस्थापना कडल्यान भाड्यान घेतिल्ली. त्या आस्थापनाच्या धनया कडल्यान पुलिसांनी दुबाविता कडेन संपर्क केलो आनी ताका पुलीस स्टेशनार चवकशे खातीर हाजीर रावपाक सांगलें. पुलिसांनी हें प्रकरण हीट अॅण्ड रन अपघात म्हूण नोंद केलां. अपघाताचो पंचनानो पुलीस हवालदार निलेश घाडी हांणी कलो. ह्या प्रकरणांतलो फुडलो तपास पुलीस निरिक्षक निखील पालेकार हांच्या मार्गदर्शना खाला चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
