भांगरभूंय | प्रतिनिधी
म्हापशें: पर्रा हीट अॅण्ड रन अपघातांत गंभीर खमी जाल्ले दुचाकी चालक नंदकिशोर लक्ष्मण साळगांवकार (58, रा. पर्रा) हांकां गोमॅकाँत मरण आयलें.
हो अपघात बिरेस्तारा उत्तररातीं 12 ते 12.30 वरांच्या सुमाराक लिंगाभाट पर्रा हांगासरल्या शांतादुर्गा बार्रा कुशीक घडलो. जखमी साळगांवकार हे नागावां आपल्या सोयऱ्यांचो लग्न सुवाळो सोंपोवन दुचाकीन घरा येताले.
वाटेंत घडणूक थळार अनवळखी चारचाकी वाहनान तांचे दुचाकीक फाटल्यान धपको दिलो. ताका लागून ते रस्त्याचे कुशीक स्कुटरी सयत पडले आनी गंभीर जखमी जाले. कांय वेळान पर्रा वाठारांत पेट्रोलींग करपी रॉबर्ट जिपी वेल्या पुलिसांक मयत घडणूक थळार जखमी अवस्थेंत पडिल्लो सांपडिल्लो.
पुलिसांनी तांकां एम्बुलन्सींतल्यान पयलीं म्हापशेंच्या जिल्हो हॉस्पिटलांत दाखल केलो. थंय सावन तांकां रोखडेंच गोमॅकाँत हालयलो. थंय उपचार सुरू आसतना शुक्रारा 21 वेर सांजवेळा साळगांवकार हांकां मरण आयलें.
मजगतीं, पयली हो आप अपघाताचो प्रकार आशिल्ल्याचें दिसतालें आनी म्हापशें पुलिसांनी ते नदरेन तपास सुरू केल्लो. पूण जखमीच्या कुटुंबान केल्ले चवकशींतल्यान हो अपघात हीट अॅण्ड रनाचो प्रकार आशिल्ल्याचें उक्तडार आयलें. फुडलो तपास पुलीस निरिक्षक निखील पालेकार हांच्या मार्गदर्शना खाला पुलीस करतात.
जखमी साळगांवकार हे आखाती देशांत नोकरेक आशिल्ले. सोयऱ्यांचें 19 फेब्रुवारी दिसा लग्न आशिल्ल्यान ते 15 दिसांची सुटी घेवन गोंयांत आयिल्ले. जाल्यार बिरेस्तारा 20 फेब्रुवारी दिसा दनपारां ते विमानान आखाती देशांत परतून वचपाचे आशिल्ले. पूण लग्न सुवाळो सोंपोवन घरा परतून वतना तांचो अपघात जालो आनी तातूंतच तांकां मरण आयलें. मयत साळगांवकार हांचे फाटल्यान घरकान्न, लग्न जाल्ली भयण, भाची, भाचे असो घराबो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
