भांगरभूंय | प्रतिनिधी
एफडीए कडल्यान जेवणाचे 400 डबे नश्ट, घर सील
भांगरभूंय । प्रतिनिधी
म्हापशें : ब्रिटोवाडो पर्रा एका जेवणाचे डबे दिवपी घराचेर अन्न आनी वखदां प्रशासनाच्या (एफडीए) अधिकाऱ्यांनी धाड घातली. थंय बुरशे सुवातेर तयार करून दवरिल्लें सुमार जेवणाचे 400 डबे नश्ट केले. तशेंच ते घर सील केलें.
ही कारवाय सोमारा 7 जुलयाक केली. पर्राच्या एके बुरशे सुवातेर दवरिल्ले जेवण डब्यांनी भरपाचें काम चालू आशिल्ल्याची म्हायती ‘एफडीए’क मेळिल्ली. ताच्या आदारान त्या घराचेर अधिकाऱ्यांनी धाड घातली.
पोरण्या भाड्याक घेतिल्ल्या घरांत बुरशे सुवातेर हें जेवण रांदताले. हें जेवण बिहारांतले लोक रांदताले. चवकशे वेळार हे डबे हॉटेलांनी आनी व्हिलांनी नोकरी करपी सुरक्षारक्षक आनी हेर नोकरदार लोकांक दिताले, अशें कळ्ळें.
ही रांदची कूड सुरू करपाक ‘एफडीए’ची परवानगी घेवंक नासिल्ली. रांदची कूड आनी आयदना धुंवपाची सुवात सामकीच बुरशी आशिल्ली. ‘एफडीए’च्या अधिकाऱ्यांनी थळाव्या पंचाक आपोवन ह्या जेवणाचे बेकायदो डबे दिवपी आस्थापनाची म्हायती दिली. उपरांत सुमार 400 डब्यांतल्या जेवणाचो अधिकाऱ्यांनी विलो लायलो आनी घराक सील मारलें. मजगतीं, ह्या डबे दिवपी आस्थापनाची म्हायती कामगारांनी उक्ती करूंक ना. ताका लागून हो वेवसाय नेमको कोण चलयतालो, हें स्पश्ट जावंक ना. ‘एफडीए’चे अधिकारी रिचर्ड नोरोन्हा, राजाराम पाटील, अमीत मांद्रेंकार, लेनीन डिसा आनी नौशीन मुल्ला ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
