भांगरभूंय | प्रतिनिधी
भुमिका देवस्थान वाठारांत पुलिसांचो खर बंदोबस्त; भाविकांचें देवदर्शन
वाळपय: भुमिका देवस्थानाचो परंपरीक कालो मनयतना गांवकार, राणे आनी माजीक हांचे मजगतीं संघर्श निर्माण जालो. हाका लागून देवस्थान वाठारांत तणावाची परिस्थिती निर्माण जाली. मारबडय जाली. फातर शेंवटिले. कदेला एकामेकांचेर शेंवटून मारलीं. हाका लागून वाठारांत तणावाचें वातावरण पातळिल्लें. खूबशा जाणांक मारपेट केले उपरांत गांवकार आनी माजीक ह्या दोन म्हाजन गटाच्या भाविकांक हॉस्पिटलांत दाखल केले. उपरांत दनपारां व्हड प्रमाणांत पुलीस पंगड मागोवन पुलिसांच्या बंदोबस्तांत परंपरीक कालोत्सव मनयलो. रातीं उसरां मेरेन भाविकांनी देवदर्शनाचो लाव घेताले.
बिरेस्तारा दनपारां परंपरीक गवळण कालो मनोवपाचे आशिल्ले. हाका लागून सकाळ सावनूच पुलिसांनी बंदोबस्त दवरिल्लो. दिवचलचे पुलीस उपअधिक्षक जिवबा दळवी आनी विश्वेश कर्पे हांच्या फुडारपणा खाला खर पुलीस बंदोबस्त दवरिल्लो. कसलेच तरेची तणावाची परिस्थिती निर्माण जावची न्हय हे खातीर खासा लक्ष दवरिल्लें.
मजगतीं, मेळिल्ले म्हायती प्रमाण गांवकार म्हाजन गटाचो कोणूच ह्या परंपरीक कालोत्सवांत वांटेकार जालो ना. सद्या तरी वाद शांत जाल्ल्याचें चित्र निर्माण करपाचो यत्न करतात. पूण अजून पर्यें वाठारांत तणावाचीच स्थिती आसा. खंयच्याय खिणाक तणाव जावपाची शक्यताय न्हयकारूं येना.
वाळपय पुलिसांनी आतां मेरेन 38 जाणांचेर हिंसा करप, फातर शेंवटुवप, कदेलां शेंटवटून मारप आनी वाठारांत अशांतताय निर्माण करपा खातीर जापसालदार आशिल्ल्यांचेर गुन्यांव दाखल केल्यात.
बुधवारा परंपरीक कालोत्सव मनयतना देवळांत प्रवेश दिवंक नाशिल्ल्यान तणावाची परिस्थिती निर्माण जाल्ली. उपरांत गांवकार समाजाच्या सुमार 25 परस चड लोकांक मारपेट जाल्ली. तांकां हॉस्पिटलांत दाखल केल्ले. हाका परती जाप दिवपा खातीर गांवकार समाज आक्रमक जावपाची शक्यताय उक्तायतात. पूण गांवकार समाज बिरेस्तारा मनयतल्या गवळण ह्या परंपरीक कालोत्सवांत वांटेकार जावंक नाशिल्ल्याचें नदरेक आयलें.
एका गांवकार प्रतिनिधीन उलयतना सांगलें, जंय मान सन्मान ना थंय अशे तरेच्या उत्सवांत वांटेकार जावपाक कसलो अर्थ आसा असो प्रस्न तांणी केलो. सरकारी यंत्रणा आनी राजकी इत्साशक्त गांवकार समाजाच्या विरोधांत आशिल्ल्याचें बुधावरचे घडणुके वेल्यान स्पश्ट जालां. हे विशीं न्यायालयांत दाद मागतले अशें तांणी म्हणलें.
मजगतीं, दिवचलचे पुलीस उपअधिक्षक जिवबा दळवी हांणी सद्या भुमिका देवस्थान वाठारांतली परिस्थिती नियंत्रणा खाला आशिल्ल्याचें म्हणलें. सद्या तरी कसलेच तरेचो तणाव ना. बिरेस्तारा मनयिल्लो गवळण कालो हो व्हड उमेदीन पार पडलो. हातूंत व्हड प्रमाणांत भाविकांनी वांटो घेतलो. देवदर्शनाचो लाव घेवपा खातीर भावीक रांगेंत उबे आशिल्ले. हाका लागून सद्या तरी शांततायेचें वातावरण आशिल्ल्याचो दावो जिवबा दळवी हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
