पर्येंच्या देवळांतल्यो कार्यावळी कायद्यानूच जातल्यो

भांगरभूंय | प्रतिनिधी

मुख्यमंत्र्यान आस्वासन दिल्ल्याचें गांवकार समाजाचो दावो

भांगरभूंय । प्रतिनिधी

वाळपयः श्री भूमिका देवी मंदिराच्या राखणदार सांखळेश्वराचे पुजे वयल्यान सुरू जाल्ल्या वादांत उपजिल्होधिकारी पल्लवी मिश्रा हांणी दिल्लो निर्णय चुकीचो आसा, अशी हरकत घेवन आयतारा गांवकार समाजान मुख्यमंत्री डॉ. प्रमोद सावंत हांचे कडेन धांव घेतली. गांवकार समाजान आपल्याचेर जाल्ल्या अन्यायाची म्हायती मुख्यमंत्र्यांक दिली. त्या वेळार मुख्यमंत्र्यान सगळ्यो गजाली जिल्होधिकाऱ्या वतीन कायदेशीर पद्दतीनूच जातलें, अशें आस्वासन दिलां, अशें गांवकार समाजान सांगलें.

खर पुलीस बंदोबस्त आशिल्यान शेनवारा उत्सव शांततायेन जालो. सध्या पर्यें देवस्थाना भोंवतणच्या वाठारांत खर पुलीस बंदोबस्त दवरला. उपअधिक्षक जिवबा दळवी हांच्या फुडारपणा खाला पावला पावलार बंदोबस्त आसा. पल्लवी मिश्रा हांणी पांच जाणांचेर गुन्यांव दाखल करपाचे निर्देश दिल्ले. तशेंच शेनवाराचो परंपरीक सप्ता उत्सव आनी आयतारचो पंरपरीक गवळण कालो ह्या तणावाचे परिस्थितींत निर्माण जावचो न्हय हे खातीर पर्ये देवस्थान वाठारांत 144 कलम लायिल्लें. 24 डिसेंबर मेरेन देवस्थान बंद दवरपाचोय तांणी आदेश दिल्लो. ह्या आदेशाक गांवकार समाज सोडून हेरांनी खर विरोध केल्लो.

मजगतीं, गांवकार समाजान मुख्यमंत्री प्रमोद सावंत हांचे वांगडा जाल्ले भेटी संबंदांत समाधान उक्तायलां. देवस्थानाच्या अधिकार पदा वयल्यान निर्माण जाल्लो वाद आनी गांवकार समाजाचें अस्तित्व उणें करपाचो चलिल्लो यत्न हाका लागून मुख्यमंत्र्यान भरवसो दिल्ल्यान गांवकार समाजान समाधान उक्तायलां. मुख्यमंत्री निश्चीत गांवकार समाजाक न्याय दितले आनी देवस्थानाचे धर्मीक विधी हातूंत कसलीच आडखळ येवची ना, हे संबंदांत लक्ष दितले, असो विस्वास गांवकार समाजान उक्तायला. सध्या पर्ये वाठारांतली परिस्थिती पुराय नियंत्रणा खाला आसा. कसलोच बोवाळ ना. परंपरीक सप्ता उत्सव उमेदीन मनयलो. तशेंच आयतारा आशिल्लो परंपरीक गवळण कालो लेगीत भक्तीभावान मनयलो.