भांगरभूंय | प्रतिनिधी
गुन्यांव फाटीं घेवचे म्हूण भावीक, लोकांचो वाळपय पुलीस स्टेशनार मोर्चो
भांगरभूंय । प्रतिनिधी
वाळपय : पर्यें सत्तरीच्या भुमिका आनी सांखळेश्वर देवस्थानांच्या म्हाजनां मदीं निर्माण जाल्ल्या मतभेदांक लागून तणावाची परिस्थिती निर्माण जाल्ली. स म्हयन्यां आदीं ह्या देवस्थानाच्या उत्सवा वयल्यान फातर शेंवटुवप, म्हामार्ग आडोवप अश्यो घडणुको घडिल्ल्यो. ह्या संबंदांत वाळपय पुलिसांनी वट्ट 37 जाणांचेर गुन्यांव दाखल करून वाळपय प्रथम न्यायालयांत आरोपपत्रां दाखल केल्यात. ह्या आरोपपत्रांची पयली सुनावणी शुक्रारा जातली. ह्या संबंदांतले समन्स संबंदितांक मेळ्ळे उपरांत गांवांत तिडकीचें ल्हार पातळ्ळा. सुमार 500 परस अदीक जाणांनी बिरेस्तारा सांजे वेळार वाळपय पुलीस स्टेशनाचेर मोर्चो व्हरून गुन्यांव तत्काळ फाटीं घेवपाची मागणी केली. ना जाल्यार ताचे गंभीर परिणाम भोगचे पडटले, अशीय शिटकावणी दिली.
ह्या वेळार हजर आशिल्ल्या पुलीस अधिकाऱ्यान लोकांची समजूत काडपाचो यत्न केलो, मात तो निरर्थक थारलो. जे मेरेन गुन्यांव फाटीं घेवपाचें लेखी आस्वासन मेळना ते मेरेन वाळपय पुलीस स्टेशन सोडचे नात अशी भुमिका घेतली. ताका लागून गंभीर परिस्थिती निर्माण जाली. हाची दखल घेवन पर्येची आमदार डॉ, देविया राणे हांणी मुख्यमंत्री डॉ. प्रमोद सावंत हांचे कडेन ताकतिकेन बसका घेवन हे संबंदांत खोलायेन चर्चा केली. राणे हांचे मध्यस्थीन मुख्यमंत्री डॉ. सावंत हांणी ह्या प्रकरणांत लक्ष घालपाचें आस्वासन दिलें आनी आंदोलन करप्यांच्या शिश्टमंडळा वांगडा शुक्रारा दनपारां 12 वरांचेर विधानसभा विभागांत विशेश बसकेचें आयोजन केलां. हे खातीर वाळपयच्या पुलीस स्टेशनाचेर केल्लें आंदोलन बिरेस्तारा सांजेच्या 7 वरांच्या सुमाराक फाटीं घेतलें. सुमार 6 म्हयन्यां आदीं भुमिका देवस्थाना कुशीक आशिल्ल्या सांखळेश्वर देवस्थानाच्या उत्सवा वयल्यान वाद निर्माण जाल्लो. डिसेंबरांत ह्या देवस्थानाचो वर्धापन दीस मनोवपा वयल्यान हो वाद निर्माण जाल्लो. एका गटान देवस्थानाचो वर्धापन दीस फांतोडेर मनयल्लो. ताका लागून हेरांनी हाका खर विरोध करून हे संबंदांत आंदोलन केल्लें. आंदोलनाचें रुपांतर उपरांत मारामारीत जाल्लें. राती कडेन पुलिसांचेर फातर शेंवटिल्ले. गोंय- बेळगांव म्हामार्ग आडयल्लो. हाका लागुन पुलिसांनी वट्ट 37 जाणांचेर गुन्यांव दाखल केल्ले. कांय म्हयन्यां आदीं हे संबंदांतलें आरोपपत्र वाळपय प्रथमवर्ग न्यायलयांत सादर केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
