भांगरभूंय | प्रतिनिधी
केंद्रीय मंत्री राजीव रंजन हांची खंत
भांगरभूंय । प्रतिनिधी
पणजीः पर्यावरम बदलांक लागून गोरवां आनी दूद उत्पादनांक मार बसला. पर्यावरणा कडेन आतां कसलोच हस्तक्षेप करिनासतना आमकां उत्पादन तांक वाडोवपाक जाय. गोरवां दुयेंस मुक्त करपाक जाय, असो उलो केंद्रीय नुस्तेमारी, दूद आनी गोरवां सांबाळ मंत्री राजीव रंजन हांणी सांगलें.
पोसपाच्या जनावरांच्या मळा वयली संघटणा क्लेम्फा ऑफ इंडिया हांणी दोन दिसांचें शाश्वत जनावर मळ धोको, आव्हानां आनी संद ह्या विशयाचेर कांदोळे परिसंवाद घडोवन हाडलो. ह्या वेळार मुखेल सोयरे म् हूण मंत्री सिंह शिश्टमंडळा कडेन उलयताले. ह्या वेलार केंद्रीय गोरवां साबाल आयुक्त डॉ. अभिजीत मित्रा, क्लेम्फाचे अध्यक्ष सुरेश देवरा आनी हेर मानेस्त हाजीर आशिल्ले.
हवामान बदलांच्या परिणामांक लागून जमनी पोंदच्या उदकाची पातळी देंवता आनी उदकाचो प्रस्न निर्माण जाला. रानां बोडकी केल्ल्यान चरपाच्यो सुवातो ना जाल्यात. हाका लागून गोरवांची भलायकी इबाडटा आनी ताचो परिणाम दूद उत्पादनाचेर जाता, अशी खंत रंजन हांणी उक्तायली.
ह्या मळाचेर शाश्वताय हाडप हें एक आव्हान आसा. ते खातीर पर्यावरणा वांगडा खेळा नासतना आमकां दुदाचें उत्पादन वाडोवपाचेर भर दिवपाक जाय, अशें रंजन हांणी सांगलें.
आमी गोंरवांक टॅग लावन चीप बसयल्यात. तशेंच तांकां एफएमडी दुयेंस जावचें न्हय हे खातीर वासीन दिवपाचें काम हातांत घेतलां. पांवड्या पांवड्यार ही मोहीम चालीक लावन एफएमडी मुक्त भारत, ही आमची मोख आसा, अशें रंजन हांणी स्पश्ट केलें.
पुराय संवसारांत भारत गतीन गोरवां पोसपाच्या मळार फुडें वता. ते भायर दूद उत्पादनूय वाडटा. 2014 चे आदीं गोरवां सांबाळ मळ आशिल्लें, पूण उत्पादन जाय नाशिल्लें. फाटल्यान 9 वर्सांत स टक्के उत्पादन वाडलां. जाल्यार संवसाराचो दर 2 टक्के आसा, अशी म्हायती रंजन हांणी दिली. भारतांतलो दर मनीस दर दिसा 450 ग्राम दूद पियेता. 2013 – 14 आदीं दर मनीस दिसाक 325 ग्राम दूद पियेतालो. 2014 चे आदीं 78 दशलक्ष तांतया खपतालीं तीं आतां 138 दशलक्ष तांतयां खपतात. दूद उत्पादनांत संवसारांत आमी पयले सुवातेर आसात, अशें रंजन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
