भांगरभूंय | प्रतिनिधी
हालींच लोकसभेंत जाल्ले एके चर्चे वेळार जाप दिताना केंद्रीय कार्मिक राज्यमंत्री डॉ. जितेंद्र सिंह हांणी फाटल्या
सात वर्सांनी 7 लाख 22 हजार सरकारी नोकरी दिल्ल्याचें सांगलें. 22 कोटीं परस चड अर्ज ह्या नोकऱ्यां खातीर आयिल्ले अशी लेगीत म्हायती मेळ्ळी. गोंयचे मुख्यमंत्री डॉ. प्रमोद सावंत हांणी तर चड शिकिल्ले उमेदवार सकयल्या पदां खातीर अर्ज करतात अशी खंत व्यक्त केल्ली. हें सगलें सांगपाचें म्हळ्यार नोकरेचे वाटेक वचनासतना चोडणेंच्या एम टेक जाल्ल्या साहिल गांवकार हाणें स्वतंत्र वेवसाय सुरु करताना सोलर ऊर्जेचेर चलपी उपकरणाची डिलरशिप सुरु केली. खरेंतर तो हेर उत्पादनांची डिलरशिप घेवं शकतालो, पूण कांय वर्सा भितर उर्जेचो प्रश्न गंभीर जातलो तेन्ना आमकां पर्यायी ऊर्जे कडेन वच्चें पडटलें. देखून आतां सावनूच आमी तयारी करपाक जाय, हो पर्यावरणीय विचार लेगीत ताच्या ह्या निर्णया फाटल्यान आसा.
केंद्रीय मंत्री नितीन गडकरी हांणी तर पर्यायी इंधनाचो उलो मारला. इथेनॉलाचो उपेग करपाचो प्रयोग सुरु करून तो यशस्वी करुनूय दाखयलो. हो प्रयोग साहिलच्या कानार पडिल्लो. साहिलान पर्यायी इंधनाक कितें तरी उपाय सोदूंक जाय हें दिसतालें. तो म्हणटा, कोळश्याचेर आमी वीज उत्पादन करतात खरें, पूण हाका बेगीनूच मर्यादा येवपाक लागतली. मागीर कितें? जशें पावसाचें उदक आमी सांठोवन दवरीनात आनी तें दर्याक वचून मेळटा. आमी तें फुकट घालयतात. तेच परीं सौर शक्ती जी आमकां सूर्य दिसभर दिता, तिचो जर आमी उपेग केलो तर फुडें फाटीं आमकां इंधना खातीर हुस्को करपाची गरज ना. आता ह्या सूर्यकिरणाक आडोवन ते एका बॅटरींत दवरपाक मेळटा. ताचो उपेग करपाक मेळटा. हें तंत्रगिन्यान चड प्रमाणान निर्माण जालें की तें सर्व सामान्यांक परवडटलें. म्हूण तर सद्या सरकार अनुदान दिता. ह्या सूर्याच्या शक्तीचेर चलपी बरींच उत्पादनां आयल्यांत. हातून सोलर शेगडी, कंदील सारक्यो वस्तू आसातक. तुमच्या घराक तुमी उदक तापोवपाक हिटर ना जाल्यार वीज मेळोवपाक शकतात.
साहीलान गोंयांत अभियांत्रिकी शिकप पुराय केलें. तो एकदा तंत्रज्ञानाचेर आधारित आशिल्ल्या एका प्रदर्शनाक पावलो. थंय ताका तंत्रज्ञानाच्या मजतीन अजब दीस सारखे सोद पळोवपाक मेळ्ळे. देखीक रोबोटिक्स हो यंत्र मनीस अडचणीच्या सुवातेर आमी वापरूंक शकता. फक्त सद्या हें तंत्रज्ञान सामान्य जनतेक परवडपाचें ना. पूण सौर उत्पादनां लोकांनी वापरची घेवची म्हूण सरकारच मजत करता, गोवा सरकारान लेगीत हे दिशेन पावलां उखल्ल्यांत, हें लक्षान येतकच ताणें एम टेक (तेजपूर- आसाम विद्यापीठ) करून सौर उत्पादनांची डिलरशीप घेतली.
ताचो बाबा संतोष हे उपक्रमशील शिक्षक, पर्यावरण सांबाळून घेवचें हे खातीर जायते प्रयोग करपी, मार्गदर्शन करपी. राष्ट्रीय पुरस्कार विजेते. साहिलाच्या कानार तांचे विचार, मार्गदर्शन वतालें. ह्या कारणा खातीर जायत, पूण ताणें पर्यावरण पूरक असो वेवसाय वेंचलो. तो म्हणटा, सौर ऊर्जा म्हळ्यार द्रौपदीची सोंपनाशिल्ली थाळी. ताचो तुमी, आमी जरूर उपेग करपाक जाय. सुदैवान सरकार लेगीत हाचेर काम करता. साहिल आपल्या गिरायकांक हाचो लाव कितें हें वेवस्थित सांगता. लायटीचें बिल सगल्यांक परवडटा, अशें ना. तांका सौर ऊर्जेतल्यान मेळपी लायटीचो उपेग जाता. येणाऱ्या काळात सुर्याची ऊर्जा आमकां वापरुंक मेळूं शकता, हे नजरेन वैज्ञानिक, अभियंते संशोधन करीत आसात. ऊर्जा समस्या ही फक्त आमचीच समस्या ना तर प्लास्टिक, हेर कोयरा सारकी अख्ख्या संवसाराची समस्या जावन आसा. साहिल म्हणटा, सौर उर्जेचो वेवसाय म्हळ्यार पर्यावरणाक पूरक वेवसाय. शिवाय तुमी दुसऱ्याक रोजगार दिवं शकता. म्हजो वेवसाय करतना दुसऱ्याकूय हांव रोजगार दिव शकलो ही समाधानाची गजाल. दिवचले झेनिथ ह्या नांवांन ताणें हो वेवसाय सुरु केला. Gova energy development agency गेरा ह्या पाटो पुला लागीं आशिल्ल्या कार्यालयांतल्यान तुमकां हाची म्हायती मेळूं शकता. नाजाल्यार तुमी साहिलाक (93072 52450) हाचेर सम्पर्क करूं शकतात.
प्रा. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
