भांगरभूंय | प्रतिनिधी
पर्यावरण आनी हवामान बदल खात्याची अधिसुचोवणी जारी
भांगरभूंय । प्रतिनिधी
पणजी : पर्यावरण आनी हवामान बदल खात्यान गोंयांतल्या विवीध बांदकाम प्रकल्पांक लागपी पर्यावरणीय दाखल्यांच्या प्रक्रिया शुल्कांत घसघशीत वाड केल्या. बांदकाम प्रकल्प, रिव्हर व्हॅली प्रकल्प, टावनशीप, गौण आनी मुखेल मिना खणी, उद्देग, विमानतळ, राज्य म्हामार्ग, बंदर, डिस्टलरी अश्या विवीध तरेच्या नव्या बांदकाम प्रकल्पांत तशेंच हे आदीं अस्तित्वांत आशिल्ल्या प्रकल्पांच्या विस्ताराक पर्यावरण दाखलो दिवचे खातीर चड शुल्क भरचें पडटलें. हे संबंदांत हालींच खात्यान अधिसुचोवणी जारी केल्या.
हे आदीं 20 हजार ते 1.50 लाख चौखण बांदकामा खातीर 2 लाख रुपया शुल्क घेताले. ते वाडोवन आतां दरेका चौखण मिटराक 30 रुपया केल्यात. हाचोच अर्थ 20 हजार ते 1.50 लाख चौखम मिटर बांदकामा खातीर आतां 6 ते 45 लाख रुपया भरचे पडटले. आदीं 1.50 ते 3 लाख चौखण मिटरांच्या बांदकामा खातीर 3 लाख रुपया शुल्क आशिल्लें. आतां तें वाडोवन 75 लाख ते 1.50 कोटी रुपया केल्यात. ते भायर सध्या अस्तित्वांत आशिल्ल्या बांदकामांत विस्तार, बदल करचे खातीरचे शुल्क लेगीत वाडयलां.
मुखेल मिना खणी खातीर पर्यावरणीय शुल्कांत दुपेटी पसस अदीक वाड केल्या. हे आदीं 100 हॅक्टर मेरेनच्या खणी खातीर पर्यावरणीय दाखलो शुल्क 7.50 लाख रुपया आशिल्लें. आतां तें वाडोवन 15 लाख रुपया केल्यात. हे खणीच्या विस्तारा खातीर हे आदीं 3 लाख रुपया शुल्क आशिल्लें. तें वाडोवन 10 लाख रुपया केल्यात. 100 ते 150 हॅक्टर मेरेनचें शुल्क 10 लाखां वयल्यान 20 लाख रुपया, 150 ते 200 हॅक्टर मेरेनचें शुल्क 15 लाखां वयल्यान 30 लाख रुपया जाल्यार 200 हॅक्टरा परस अदीक खणी खातीरचें शुल्क 20 लाखां वयल्यान वाडोवन 30 लाख रुपया केलां. तशेंच खणीच्या विस्तारा खातीरचें शुल्क लेगीत वाडयलां. ते भायर 100 कोटी रुपया मेरेमच्या नव्या उद्देगा खातीरचें पर्यावरणीय दाखलो शुल्क 1 लाखा वयल्यान 15 लाख, जाल्यार 100 कोटी वयल्या प्रकल्पा खातीरचें शुल्क 2 लाखां वयल्यान 20 लाख रुपया केलां. रिव्हर व्हॅली प्रकल्पा खातीरचें शुल्क 2 लाखां वयल्यान 8 लाख रुपया, डिस्टलरी प्रकल्पा खातीरचें शुल्क 3 लाखां वयल्यान 8 लाख रुपया, विमानतळ विस्तारा खातीर 2.50 लाखां वयल्यान 10 लाख रुपया, बंदरा खातीर 2 लाखां वयल्यान 5 लाख रुपया, 50 किलोमिटर परस चड लांबायेच्या राज्य म्हामार्गा खातीर 3 लाखां वयल्यान 10 लाख रुपया शुल्क केलां.
रेंव काडपा खातीर 1 लाख शुल्क
गौण मिनांच्या विभागांत रेंव काडपाच्या पर्यावरणीय दाखल्या खातीर 1 लाख रुपया शुल्क भरचें पडटलें. नवे चिऱ्या खणी खातीर 1 लाख, चिऱ्या खणीच्या विस्तारा खातीर75 हजार, नव्या बेसाल्ट खातीर 1.50 लाख जाल्यार ताच्या विस्तारा खातीर 1 लाख रुपया शुल्क आसतलें. तशेंच गौण मिना खणींत बदल, विस्तार हे खातीर 25 ते 50 हजार रुपया शुल्क घेतले, अशें अधिसुचोवणेंत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
