भांगरभूंय | प्रतिनिधी
अभिजीत घोरपडेः नारायण आठवले यादस्तीक पत्रकारिता पुरस्कार भेटयलो
भांगरभूंय । प्रतिनिधी
फोडें: आधुनीक युगांत पर्यावरणाचे प्रस्न गंभीर जाल्यात. पर्यावरण मोगी खरेंपण उजवाडाक हाडटात, तरी लेगीत गंभीर प्रस्नांचेर सकारात्कम चर्चा करून प्रस्न सोडोवपाचे यत्न जायनात. तेच खातीर पर्यावरणाचीं कितलीशींच आव्हानां लोकां मुखार उबीं रावतात, अशें पत्रकार आनी पर्यावरण अभ्यासक अभिजीत घोरपडे हांणी सांगलें.
ढवळेच्या लोकविस्वास प्रतिश्ठनाच्या सर्गेस्त नारायण आठवले यादस्तीक पत्रकारिता पुरस्कार स्विकारले उपरांत घोरपडे उलयताले. उद्देजक आनी शिक्षण मळा वयले आदारस्तंभ परेश वसंत जोशी हांचे हस्तुकीं अभिजीत घोरपडे हांकां पुरस्कार भेटयलो. ह्या वेळार ज्येश्ठ साहित्यीक आनी पत्रकार विजय कुवळेंकार, अध्यक्ष अनुप प्रियोळकार आनी भांडारी नारायण नावती हाजीर आशिल्ले.
पत्रकारितेचें माध्यम बदलत आसा. समाजीक तशेंच पर्यावरण संबंदांत लोकां मेरेन अदीक म्हायती पावोवन प्रस्नाचेर सकारात्मक उपाय काडपाचो यत्न जायना. गोंयांतलो म्हादय प्रस्न सध्या गाजता. फुडारांत आनीक नवे प्रस्न गंभीर स्वरुपांत आव्हानां निर्माण करतले. ते खातीर दरेका मनशान पर्यावरणाचो समतोल राखपाचो यत्न करपाक जाय, अशें घोरपडे हांणी सांगलें.
ह्या वेळार परेश जोशी आनी विजय कुवळेंकार हांणी आपले विचार मांडले.
परेश जोशी हांचे हस्तुकीं शिक्षिका दीपाली महाजन आनी कर्मचारी नितीन गावडे हांचो भोवमान केलो. जाल्यार अभिजीत घोरपडे हांकां यादस्तीक चिन्न, मानपत्र आनी रोख 15 हजार रुपया भेटयले. अनुप प्रियोळकार हांणी येवकार दिलो आनी प्रास्तावीक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
