भांगरभूंय | प्रतिनिधी
राजीव कुमार गुप्ताः 18 रान रक्षक सरकारी सेवेंत दाखल
भांगरभूंय । प्रतिनिधी
वाळपयः पर्यावरण हो दरेकल्याचे जिणेंतलो म्हत्वाचो घटक. ताका लागून दरेकल्यान पर्यावरणाची राखण करप तितलेंच मह्त्वाचें. रान खात्यांत काम करतना पर्यावरण हो आपले जिणेंचो म्हत्वाचो घटक असो मानचो. सरकारी नोकरी समजनासतना पर्यावरण आनी सैमाची राखण करपाक प्राधान्य दियात, अशें गोंय रान खात्याचे प्रधान मुखेल रान संरक्षक राजीव कुमार गुप्ता हांणी सांगलें.
18 रान रक्षक सरकारी सेवेंत दाखल जाल्यात. तांचो स म्हयन्यांचो प्रशिक्षणाचो काळ पुराय जाले उपांत दीक्षांत सुवाळयांत गुप्ता मुखेल सोयरे म्हूण उलयताले. वाळपयच्या गोंय राज्य रान संशोधन आनी प्रशिक्षण केंद्रांत ही कार्यावळ आयोजीत केल्ली. ह्या वेळार माचयेर मुख्य रान संरक्षक प्रवीण राघव गोंय राज्य रान संशोधन आनी प्रशिक्षण केंद्र संचालक तशेंच उप रान संरक्षक तेजस्विनी पुसुलरी, सहाय्यक उप रान संरक्षक चोडणकार, गोंय राज्य रान संशोधन आनी प्रशिक्षण केंद्राचे प्रभारी प्राचार्य विश्वनाथ पिंगुळकार आनी हेर मानेस्त हाजीर आशिल्ले.
ज्या वाठारांत रान रक्षकांची नेमणूक करतले, थंय पारदर्शकतायेन काम करात. थळाव्या लोकां कडेन बरे संबंद जोडात. रान, पर्यावरण, सैम आनी थळावे लोक हांचे मदीं बरे संबंद निर्माण जाले जाल्यार रान खात्याची जापसालदारकी सोंपी जातली. ते खातीर दरेकल्यान आपले तरेन योगदान दिवप गरजेचें आसा, अशें गुप्ता हांणी सांगलें.
प्रवीण राघव हांणी सांगलें, रानां नश्ट जालीं जाल्यार ताचे जैवविविधतायेचेर गंभीर परिणाम जावपाक शकतात. तेचवरी बफर झोनाकूय व्हड धोको निर्माण जावपाक शकता, हाची दरेकल्यान जाणीव दवरची. कसल्याच चेपणाक बळी पडनासतना आपलें काम प्रभावी आनी पादर्शकातेयेन करचें.
प्रशिक्षण काळांत प्रशिक्षणार्थींक उत्कृश्ट तरेन प्रशिक्षणाचे धडे दिल्ले खातीर प्रशिक्षक चंद्रकांत आयकार, सोमनाथ बेतोडकार, कृपाश फडते, राम गांवकार, शिवनाथ गांवकार, मनोहर गावडे, प्रियांका गावडे, लक्ष्मण गवस, महादेव गांवस, शांताराम गांवस, मिलन मडकयकार, तृप्ती माटणेंकार, जयंती मिसाळ, राहुल मोचेमाडकार, चंदू नायक, गोविंद नायक, विश्वास नायक, अविनाश परब हांचो मानेस्तां हस्तुकीं भोवमान केलो.
तेजस्विनी हांणी येवकार दिलो आनी प्रास्तावीक केलें. प्राचार्य पिंगुळकार हांणी उपकार मानले. सुरवेक मानेस्तांनी संचालनाची पळोवणी केली. कार्यावळी उपरांत केंद्राच्या विवीध वाठारांत झाडांचे रोंपे लायले. तातूंत विवीध वखदीं झाडांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
