भांगरभूंय | प्रतिनिधी
न्यायमूर्ती फेर्दीन रिबेलो : सरकाराच्या निर्णयाचेर नदर
भांगरभूंय । प्रतिनिधी
मडगांव: राज्यांतल्या पर्यावरणाक धोक्याचे थारपी कायदे रद्द करचे, ही आमची मुखेल मागणी आसा. तशेंच गांवचे ‘वहन तांकी’चो (कॅरिंग कॅपेसिटी) अभ्यास करप आनी हेर म्हत्वाच्या मुद्यांचेर सरकार कितें निर्णय घेता, तशेंच ह्या अभ्यासा खातीर निधीची तरतूद करतात काय, ह्या सगल्या गजालींचेर आमचें लक्ष आसा. विधानसभेंतल्या घडामोडींचो नियाळ घेतले उपरांतूच बसकेंत चर्चा करून ‘इनाफ इज इनाफ’ आंदोलनाची फुडली दिका थारायतले, अशी म्हायती आदले न्यायमूर्ती फेर्दीन रिबेलो हांणी दिली.
नगर नियोजन कायद्या आडचे चळवळी विशीं उलयतना रिबेलो हांणी सांगलें, जमनींचे विक्रेक अमर्याद अधिकार दिवपी जाचक कायदे बदलपा खातीर ही चळवळ सुरू केल्या. कायदे बदला खातीर गरजेचो मसुदो तयार करून ताच्यो प्रती सत्ताधारी आनी विरोधी अशा दोनूय वटांच्या आमदारांक दिल्यात. आतां हाचेर विधानसभेंत कितें निर्णय जाता, हें पळोवप म्हत्वाचें. मजगतीं फोंडें, मुरगांव, केपें हाचे सयत राज्याच्या विवीध भागांत लोकांच्यो आनी संस्थेच्या पदाधिकार्यांच्यो बसका घेतल्यात. गोंयच्या पर्यावरणाक घातकी थारपी कायद्यांतलीं कलमां रद्द जावचीं, हे खातीर दरेका म्हालांतले जनतेन रस्त्यार देंवून विरोध केला. आतां सरकार हाचेर कितें पावल उखलता, ते प्रमाण मुखारची रणनीती थारायतले. पणजी आनी रेईश मागूस सयत विवीध सुवातांचेर नागरीक आनी समाजीक कार्यकर्ते कॅसिनोंक विरोध करतात. ह्या विरोधा आड न्यायालयांत याचिका दाखल करपाची तयारी सुरू आशिल्ल्यान वकिलांचो एक पंगड मसुदो तयार करपाचें काम फुकट करता. हे प्रक्रियेचो पयलो पांवडो आशिल्ल्यान हाचे खातीर उण्यांत उणो स म्हयन्यांचो काळ लागपाक शकता. मांडवी न्हंयेंतले सध्याचे पांच कॅसिनो बोटींच्या अभ्यासांतल्यान जायत्यो धपको दिवपी गजाली मुखार आयल्यात. त्यो सगल्यो न्यायालयांत मांडटले, अशेंय न्या. रिबेलो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
