भांगरभूंय | प्रतिनिधी
अॅमस्टरडेम, खबरां संस्था : स्वीडनाची पर्यावरणवादी ग्रेटा थनबर्ग हाणें हवामान चळवळी कडेन संबंदीत कार्यावळींत पॅलेस्टिनींक समर्थन दिल्ल्याचो आरोप करीत एक व्यक्ती माचयेर आयली आनी तिणें ग्रेटाच्या हातांतलो मायक ओडून आपलें म्हणणें मांडलें. नेदरलँडांत ही घडणूक घडली.
ग्रेटान एके पॅलेस्टिनी- अफगाणी बायलेक माचयेर आपयली तेन्ना ही व्यक्ती माचयेचेर गेली. ‘हांव हांगा हवामान चळवळी विशीं आयलां. राजकी कार्यावळी खातीर न्हय’, अशें त्या मनशान ग्रेटाक उद्देशून म्हणलें. ग्रेटाचो मायक ताणें ओडून घेतलो. तेन्ना माचये वयल्या हेर वावुरप्यांनी त्या मनशाक कुशीक काडलो.
हे विशीं प्रतिक्रिया दितना ग्रेटान सांगलें, ‘हवामान चळवळीची कार्यावळ आसली तरी जांचेर अत्याचार जातात आनी जे स्वातंत्र्या खातीर, न्याया खातीर लढटात तांचो आवाज आमकां आयकुचो पडटलो. आंतरराष्ट्रीय एकवटा बगर हवामान चळवळ आसपाकूच शकना.’
हे कार्यावळींत ग्रेटान पारंपरीक पॅलेस्टिनी स्कार्फ (केफियेह) घाल्लो. ह्या वेळार उपस्थित लोकांनी ‘पॅलेस्टायन मुक्त जातलें’, ‘न्हयेपसून दर्या मेरेन पॅलेस्टायन मुक्त जातलें’, अश्यो घोशणा दिल्ल्याची खबर रॉयटर्सान दिल्या.
मजगतीं, ते व्यक्तीची वळख पटूंक ना. ताच्या जॅकेटाचेर Natuurlijk (सैमिक) अशें बरयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
