भांगरभूंय | प्रतिनिधी
बंगळुरू, खबरां संस्था ः कर्नाटकांतल्या दावणगिरी, शिमोगा आनी हनोली जिल्लांतल्या बारा गांवांनी 1990 आनी 2000 च्या दशकांत दुकळ पडिल्लो. तेन्ना ह्या गांवांनी तांची जिणे पद्दत बदल्ली. तांणी झाडां कापप बंद केलें. गुड्डामादापुरम गांवचे शेतकार करिबसावप्पा कागिनेले हांच्या फुडाकारान 12 गांवांतल्या 4500 लोकांनी ओसाड दोंगुल्ल्यांचेर 1 कोटी परस चड रोप रोयलें.
हाका लागून 3 हजार एकरा परस चड वाठार रानांत रुपांतर जालो. हाका लागून 50 बांय, 12 तळीं परतून भरल्यो. शेंकड्यांनी सुक्या बोरवेलांक उदक आयलें. हे खातीर गांवकारांनी रानां खात्याच्या मजतीन सिध्देश्वर गांव रानां समिती स्थापन केली. हे समितीन झाडां आनी वनस्पती राखून दवरपा खातीर गस्त पंगड तयार केलो. शिकारी आनी झाड कापपी मनशाक धरल्यार ताका दंड घालतात. हातूंतल्यान एकठांय जाल्ले पयशे रानां उदरगतीचेर खर्च करतात. पयलीं झाडां कापपी जायत्या जाणांनी आतां तीं वाचवपाक सुरवात केल्या. करिबसावप्पा म्हणटा, गांवांत आतां भरपूर उदक आसा. हें उदक थांबवपा खातीर 12 सुवातींनी चेक धरण बांदपाची आमी येवजण आंखल्या.
3000 एकर ओसाड जमनीचेर 86 जातीचीं सुमार एक कोटी झाडां वाडल्यात. चंदन, आंबो, कडुलिंब सारकिल्ली वखदी आनी फळझाडां आसात. देशांत 33% रानां वाठाराचे लक्ष्य साध्य करपाक जाय जाल्यार विद्यार्थ्यांक पर्यावरणा विशीं शिकवचें आनी गांवच्या लोकांक रानांची गरज समजावची अशें महादेवप्पा सांगता.
कर्नाटकांतल्या तीन जिल्लांनी पातळिल्ल्या 12 गांवांच्या रानांतल्यान विलुप्त जाल्ले किडे आनी हेर जनावरां परतून रानांत आयली. नव्या रानाचेर संशोधन करपाची विनंती रानां खात्यान सिरसींतल्या वनीकरण महाविद्यालयाक केल्या. 2004 वर्सा गांवांत एलपीजी सिलिंडर वापरपाक लागले तेन्ना लांकूड कापपाचेर पुरायपणान बंदी घालप शक्य जालें. तशेंच जायत्यो विलुप्त जाल्ल्यो वनस्पती परतून फुलपाक लागल्यात. हाका लागून रानां खूब बेगीन तयार जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
