भांगरभूंय | प्रतिनिधी
भांगरभूंय । खबरां मेज
पणजीः संवसारांतल्या समुदायांतल्या वेवसायां सयत पक्षकारांक वादाचे फटके बसतात. ह्या आव्हानांक तोंड दिवपा खातीर पर्यायी वाद निवारण (एसडीआर) हें एक सशक्त साधन जालां अशें सर्वोच्च न्यायालयाची न्यायमूर्ती हिमा कोहली हिणे सांगलें. वागातोर हांगां इंडियन कावंसील ऑफ आर्बिट्रेशन (आयसीए) वतीन आयोजीत वेवसायीक वादांत लवाद आनी मध्यस्ती वरवीं न्याय सुलभता ह्या विशया वयले परिशदेंत मुखेल सोयरी म्हणून ती उलयताली.
परिशदेक मुंबय उच्च न्यायालयाचे न्यायमूर्ती महेश सोनक, आयसीएचे म्हासंचालक अरुण चावला, ज्येष्ठ विधिज्ञ, गोंय बार असोसिएशन ऑफ मुंबय हायकोर्टचे अध्यक्ष जे. ई. कुएल्हो परेरा, आदलो ॲड जनरल (गोंय) आनी आयसीएचे अध्यक्ष तशेंच खेतान अँड कंपनीचे वरिष्ठ भागिदार एन. जी. खेतान हाजीर आशिल्ले. न्यायमूर्ती कोहलीन सागलें की एडीआर ताची लवचिकताय, अनुकूलताय आनी कार्यक्षमते खातीर वळखतात. ताका लागून संवसारीक वेवसायांतली गुंतागुंत सुटावी करपा खातीर ताचें काम मोलादीक आसा. सद्या संवसारीकरणाक लागून सगळें नेटान फुडें वतात. ताका लागून सांस्कृतीक आनी भुगोलक शीम हुपून पातळल्ल्या वेवसायांचें दिवप-घेवप वाडलां. ताका लागून कायदेशीर आव्हानां लेगीत वाडल्यात अशें तिणे सांगलें.
आंतरराष्ट्रीय वेपार आनी गुंतवणुकींत व्हडा प्रमाणांत वाड जाल्या. ताका लागून वादाचें निराकरण चड गुंतागुंतीचें जालां. वाद फकत संबंदीत पक्षकारांकूच न्हय जाल्यार पुराय संवसारीक समुदाययाक प्रभावीत करपाक शकतात. ह्या आव्हानांत तोंड दिवपा खातीर एडीआर वेवसायां खातीर एक शक्तिशाली साधन म्हणून सामकार आयलां, लवादाची संकल्पना पंचायत वेवस्था वा ग्रामपरिशदे कडेन संबंदीत आसा. जय सामूहीक विचारविनिमया वरवीं वांद समजिकायेन सुटावे करतात. ही परंपरा सामुदायीक सहभाग आनी सहमती तयार करपाच्या मोलावणींत घुस्पल्ली आसा अशें तिणे सांगलें
राष्ट्रीय विधी सेवा प्राधिकरणान 2021-22 वर्सा प्रसिद्ध केल्ले आंकडेवारी प्रमाण भारतांत 464 एडीआर केंद्रां आसात. तातूंतली 397 कार्यरत आसात आनी 570 मध्यस्ती केंद्रा आनी 16,565 मध्यस्त आसात. 53,000 प्रकरणा मध्यस्ती वरवीं निकालांत काडल्यांत. मध्यस्ती कायदो 2023 जो भारतीय कायदेशीर परिदृश्यांतलो एक म्हत्वाचो मैलाचो फातोर आसा. तो फकत एक कायदो न्हय जाल्यार वाद सुटावो करपाच्या तळमळीचो पुरावो आसा अशी म्हायती तिणे दिली.
न्यायमूर्ती महेश सोनक हांणी देशांत एडीआर संस्कृती विकसीत करपाचेर भर दिलो. जायत्या देशांनी चड करून सिंगापूर सारक्या आग्नेय आशियाई देशांनी समजिकाय, लवाद आनी मध्यस्ती वरवीं एडीआरांत गुंतवणूक केल्या. आमी भारतांत एडीआर संस्कृती विकसीत करपाक जाय. जी प्रसारा वरवीं सगल्यांत बरे तरेन विकसीत जातली. आमच्या दुर्दैवान ढिसाळ कायदेशीर प्रक्रियेचो गैरफायदो घेवपाच्या हेतान निरर्थक खटल्यांचो अवलंब करपाचे सोडून दिवपाक जाय अशें ताणी सांगलें. न्यायमूर्ती श्रीकृष्ण हांणी ह्या धोरणाक राष्ट्रीय खटलो धोरणाचे सुवातेर राष्ट्रीय वाद निवारण धोरण अशें नांव दिवपाची सूचोवणी केली.चावला हांणी आपल्या प्रास्ताविकांत वादाचें कार्यक्षम आनी बेगीन निराकरण करपाची मागणी केन्नाच गंभीर नाशिल्ली. अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
