भांगरभूंय | प्रतिनिधी
जाची सगळेजाण वाट पळयताले ती राष्ट्रीय खेळां सर्तत गोंयांत ऑक्टोबर म्हयन्यांत जावपाची आसा आनी ताचो शुभंकर ‘मोगा’चें हालींच मुख्यमंत्री प्रमोद सावंत हांणी लोकार्पण केलें. हे सर्तीचे उक्तावण माननीय प्रधानमंत्री मोदीजी करतले, अशें तांणी जाहीर केलां. राष्ट्रीय पांवड्यार जेन्ना तुमी वांटेकार जातात तेन्ना आपलो खेळ खंय आसा, तें तपासूंक मेळटा. आयज जांचीं नाांवां जाल्यांत ते नीरज चोप्रा, दीपा कर्माकर, सानिया मिर्झा भारतीय ऑलिम्पिकची अध्यक्ष आनी धांवपटू पी टी उषा हांचे सारके खेळगडे राष्ट्रीय सर्तींत खेळूनूच व्हड जाले . फाटले फावट ही सर्त गुजरातांत जाल्ली हें तुमकां खबर आसतलेंच. आयज फाल्यां करीत शेवटाक गोंयांन ही सर्त जाता हें महत्वाचे. हातूंतले कांय खेळ आमकां नवे आसतले पूण हे सर्तीन वांटेकार जावप हें लेगीत महत्वाचें आसा.
एखादो अभ्यासा परस खेळां भितर चड नेट धरता ताका पालका वांगडा ताच्या शारीरिक शिक्षकान पारखूंक जाय आनी फुडले वाटेची कल्पना दिवपाक जाय. आतां खेळां भितर जायत्यो संधी तयार जाल्यात ताची कल्पना ताका येवं येता. आतां हाता कडे मोबायल आसात मागीर म्हायती मेळप कठीण जावं नजो. आमी जेन्ना खेळां भितर करियर करपाक सोदतात तेन्ना आमचे नजरेक मैदाना वेलो खेळगडो, पंच दिसता, पूण त्या भायर खेळां भितर कोच आसता, काॅमेंटेटर, पत्रकार आसता, आंकडे तज्ञ आसता, तिसरो पंच आसता, खेळाचें सामान विकपी आसतात. व्हड सर्ती आयोजित करपी आयोजक आसतात. राज्य, देशाचो संघ वेंचपी सदस्य आसतात. अशो जायत्यो सुवाती आसतात, हें हांव कित्याक सांगतां? जर तुमकां एका भितर अपेश आयलें तर दुसरी येवजण तयार आसपाक जाय. ना जाल्यार तुमकां अपेश येवन निराशा येवं
येता.
राष्ट्रीय सर्तीचो व्हड इतिहास आसा. सुरवातेक ती लाहोराक सुरु जाली,फाटल्या खेप ती गुजरातांत जाल्ली. गोंयांत ती आदींच जावपाची पूण तयारी नाशिल्ल्यान ती फुडें फुडें वचत अंदूं सप्टेंबर- ऑक्टोबर म्हयन्यांत जातली. तारखो समिती निश्चित करतली. खंयचेय सर्तीन जेन्ना तुमी वांटेकार जातात तेन्ना तिची थोडी तरी म्हायती तुमी घेवपाक जाय आनी आतां तें काम नेटा वरवीं सोंपें जालां. आतां गोंयांत जावपी राष्ट्रीय सर्त ही 37 वी. सर्तीची सुरवात 1924 सालान लाहोराक जाली. 1938 मेरेन ह्या सर्तीक भारतीय ऑलिम्पिक म्हूण वळखताले. गुजराताक जाल्ले सर्तीन 7000 खेळगडी 36 विंगड विंगड प्रकारांनी वांटेकार जाल्ले. अंदूं 43 क्रीडा प्रकार आसतले. हातून काय नवे प्रकारुय आसतले. देखीक लगोरी पेनकेक सिलाट. 43 प्रकारांतले सगळेच खेळ आमकां परिचित आसतले अशें ना, पूण जे खेळ परिचित आसात त्या खेळाचो सराव आमी करू शकतात. राष्ट्रीय सर्तीन निवड जाल्या वा जातली तांणी भर घेवन हांचो सराव मार्गदर्शन घेवन करचो.
तुमकां पदक मेळूं नाजाल्यार ना मेळूं पूण वांटेकार जावप चड महत्वाचें. हातूंतल्यान हेर खेळगडी कसो सराव करतात? कितें पथ्य पाळटात? कितें खावप आनी कितें खावप ना? सारक्या गजालींची कल्पना येतली. तुमचो मार्गदर्शक ह्यो गजाली जरूर सांगतलोच, पूण तुमी स्वता त्यो गजाली अणभवू शकतात. खेळां भितर जखमी जावपाची शक्यता आसता. ताचोय विचार करात. समजा ही जखम जर गंभीर आसात तर तुमी पर्यायाचो विचारूय करून दवरचो. नाजाल्यार तुमी निराश जावं शकतात. जैत ना जाल्यार अपेश हें जिणेचें आंग आसा हे नजरेंतल्यान ह्या सर्तीचो तुमी लाव घेयात. खेळा भितर जायत्यो संदीं आसतात हें तुमकां कळटलें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
