भांगरभूंय | प्रतिनिधी
वाळपय ः पर्यां साखळेश्वर देवस्थान वाद बरोच वाडलां. 24 डिसेंबर मेरेन भूमिका देवस्थान बंद दवरपाच्या आदेशाक लागून 21 तारखेक धर्मीक सप्ता आनी 22 तारखेक गवळण कालो बंद उरूं येता. हाचो निशेध करून शुक्रारा रातीं उसरां माजिक म्हाजन गटाचे लोक देवळा मुखार जमले. देवळाच्या वादाक लागून एका गटान काल रातीं आडायल्लो रस्तो आजुनय बंदूच आसा. ताका लागून त्या मार्गावेली येरादारी होंडा मार्गान वळयली. वाळपय उपजिल्हाकारी वाद मिटोवपाचो यत्न करतात.
पर्येंच्या भुमिका देवस्थाना कडेन संलग्नीत आशिल्ल्या साखळेश्वर देवस्थानाच्या वर्धापन दीस मनोवपाच्या कारणा वयल्यान वाद निर्माण जाले उपरांत त्या वाठारांत तणावाची परिस्थिती निर्माण जाली. ह्या देवस्थानाचो वर्धापन दीस सगळ्या 12 म्हाजनांनी मनोवचो असो आदेश सत्तरी उपजिल्होधिकाऱ्यान दिल्लो. तरी लेगीत माजीक गटान फांतोडेर हो विधी केल्ल्यान गांवकार म्हाजन गटान हाका खर हरकत घेतली. आदशे मोडिल्ल्यान तांचेर गुन्यांव दाखल करचो आनी तांकां अटक करची, अशी मागणी करून गांवकार म्हाजन गटान सत्तरी उपजिल्होधिकारी कार्यालया मुखार निदर्शनां केलीं.
राती उसरां भुमिका देवस्थान बंद दवरपाचो दिल्लो आदेश तत्काळ फाटीं घेवचो आनी त्या चार जाणांचेर गुन्यांव दाखल केल्यात ते रद्द करचे, अशी मागणी आंदोलकांनी केली.
मजगतीं, ह्या वेळार आक्रमक जाल्ल्या लोकांनी थंय हाजीर आशिल्ल्या पुलिसांचेर गुंडे मारिल्ल्यान एक उपनिरिक्षक जखमी जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
