भांगरभूंय | प्रतिनिधी
वाठारांतले परिस्थितीचेर बारकायेन लक्ष: जिवबा दळवी
वाळपय: फाटल्या एक सप्तका सावन देवस्थानाच्या म्हाजनां मदीं निर्माण जाल्ल्या वादाक लागून तणावाची निर्माण जाल्ली परिस्थिती निमाणें निवळ्ळी. पर्यें वाठारांत शांतताय निर्माण जाल्या. हे खातीर हांगा पुलीस बंदोबस्त दवरिल्लो तो कुशीक काडला. सद्या तरी कसलीच तणावाची परिस्थिती ना. तरी लेगीत पुलीस ह्या वाठारांत नदर दवरून आसात अशी म्हायती दिवचलचे पुलीस उपअधिक्षक जिवबा दळवी हांणी दिली.
दोन दीस मनयतल्या परंपरीक सप्ता आनी परंपरीक गवळण कालो व्हड उमेदीन मनयलो. उपरांत आयोजीत केल्ल्या परंपरीक कार्यावळीची समाप्ती केल्ल्याची म्हायती म्हाजनां कडल्यान मेळ्ळी.
पर्यां सांखळेश्वर देवस्थानाच्या वर्धापन दिसा सावन हो वाद निर्माण जाल्लो. ह्या दिसा फांतोडेर कांय म्हाजनांनी धर्मीक विधी केल्ल्यान गांवकार समाजान ताका खर आक्षेप घेतिल्लो. उपरांत हे विशींची कागाळ सत्तरी उपजिल्होधिकारी हांचे कडेन केल्ली. तांणी दिल्ले आदेश आनी उपरांत आदेशांत केल्ल्या बदलाक लागून गांवकार समाज आक्रमक जालो. जाल्यार आदेशा आड गांवकार सोडून हेर म्हाजन गटांनी खर विरोध करून पर्यें वाठारांत निदर्शनां केल्लीं. हातूंत फातर शेंवटुपाचो प्रकार जाल्लो. हातूंत कांय पुलीस जखमी जाल्ले.
उपरांत सत्तरीचे उपजिल्होधिकारी पल्लवी मिश्रा हांणी परंपरीक सप्ता आनी गवळण उत्सव सगल्यांनी मेळून मनोवपाचो आदेश दिल्लो. हातूंत गांवकार समाज वांटेकार जालो ना. उपरांत गांवकार समाजान मुख्यमंत्री डॉ. प्रमोद सावंत हांची भेट घेवन आमचेर अन्याय जायत आशिल्ल्याचें सांगिल्लें. तांणी कायदेशीर पद्दतीन ह्या प्रकरणांत लक्ष घालपाचें आस्वासन दिल्लें.
सद्या तरी ह्या वाठारांत उत्सव व्हड उमेदीन जालो. हाका लागून वाठारांत शांतताय पातळ्ळ्या. तरी लेगीत गांवकार समाज आनी माजीक ह्या दोगायं मदीं वाद निर्माण जाला. ते खातीर हो वाद केन्ना वयर सरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
