भांगरभूंय | प्रतिनिधी
पणजीः पर्यटन, सेकंड होम आनी जमनीचो उणाव हाका लागून राज्यांत जमनीचें दर अपेक्षे परस चड वाडत आसात. मागणी प्रमाण जमनीचें आनी फ्लॅटांचे दर थारत आशिल्ल्यान अदमास वा सरासरी दर लेगीत सांगप कठीण जायत आसा अशी म्हायती रियल इस्टेट वेवसायीक आनी बिल्डरांनी दिल्या.
बार्देश तालुक्यांतल्या मयडें एक अलिशान व्हिला 105 कोटी रुपयांक सूचीबद्ध जालां. हाचे वयल्यान गोंयांत जमनी, फ्लॅट आनी घरांचें दर कितले वाडल्यात हाचो अदमास येता. हे विशीं चड म्हायती दितना बांदकाम वेवसायीक देश प्रभुदेसाय हांणी सांगलें, दोना पावल (पणजी) आनी भोंवतणच्या वाठारांत जमनीचें मोल 1 लाख 50 हजार चौखण मिटर आसा. हाचे वयल्यान फ्लॅटांचें मोल अदमास करूं येता. मडगांवां जमनीचें सरासरी दर चौखण मिटराक 65 हजार आसा. पणजे परस मडगांवचे दर उणे आसात. परतून दर्यादेग वाठारांतले दर मडगांव परस चड आसात. खंयचीय सुवात वा जमीन आवडली जाल्यार सेलिब्रीटी आनी गिरेस्त लोक खंयचेंय मोल दिवपाक तयार आसतात. हाका लागून दर आनीक वाडटा. मयडेंचो व्हिला 105 कोटी रुपयांक सूचीबद्ध करपा फाटलो होच हेत आसा.
शार आनी दर्यादेग वाठारां लागसार रानां वा तळें आसल्यार त्या जमनीचेरूय बरे दर मेळटात. सेकंड होम खातीर जमीन घेवपी लोक चड करून गर्दी परस एकांत पसंत करतात. हाका लागून आतां काणकोण, पेडणें, सत्तरी ह्या गांवगिऱ्या वाठारांनीय जमनीचें दर वाडपाक लागल्यात अशी म्हायती रियल इस्टेट वेवसायिकां कडल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
